اسلام آباد۔29مارچ(اے پی پی):قومی اسمبلی دی قائمہ کمیٹی قانون و انصاف سپریم کورٹ ( کارروائی و قواعد وضوابط) ٻل 2023 ترامیم دے نال جݙاں جو وکلا فلاح وبہبود اتے تحفظ ٻل 2023 متفقہ طورتے منظور کرڳھدے ۔ ٻدھ کوں کمیٹی دا اجلاس چیئرمین کمیٹی چوہدری محمود بشیر ورک دی صدارت اچ پارلیمنٹ ہائوس وچ تھیا ۔ اجلاس اچ وفاقی وزیر قانون اعظم نذیر تارڑ، ، وفاقی وزیر سید نوید قمر،وزیر مملکت قانون ا نصاف سینیٹر شہادت اعوان ، پارلیمانی سیکرٹری قانون و انصاف مہناز اکبر عزیز، عثمان ابراہیم ، محسن نواز رانجھا ، نفیسہ شاہ، قادر خان مندوخیل، عالیہ کامران، کشور زہرہ ، ڈاکٹر رمیش کمار اتے وزارت قانون و انصاف دے حکام شرکت کیتی۔ اجلاس اچ ٻل تے ڳالھ کریندے ہوئیں وفاقی وزیر قانون و انصاف اعظم نذیر تارڑ آکھیے گزریل ݙینھ قومی اسمبلی اجلاس اچ پیش تھیوݨ آلے بل کوں ایں کمیٹی اچ بھجوایا ڳئے ۔سپریم کورٹ اچ انصاف دے تقاضیں کوں پورا کرݨ کیتے اے ٻل پیش کیتا ڳئے ۔184(3) دے دائرہ اختیار تے بحث کیتی ونڄے ۔ انہاں آکھیے بنیادی حقوق دے حوالے نال وزارت قانون پہلے ہی کم کریندی پئی ہئی ، گزریل ݙینھاں سپریم کورٹ دے فیصلیں دی صورت اچ وی آوازاں آئن ۔ اساں سمجھدوں جو اے مناسب ویلھا اے جو پارلیمنٹ آپݨا کردار نبھاوے ۔ انہاں آکھیے آئین دا آرٹیکل 4 ، 10 اتے آرٹیکل 25 شفاف ٹرائل تے انصاف دے بنیادی اصولاں کوں پورا کریندے ۔ سابق چیف جسٹس افتخار چوہدری دے بعد آوݨ آلے 3 چیف جسٹس از خود نوٹس دا ٻہوں گھٹ استعمال کیتا۔ انہاں دے بعد سابق چیف جسٹس ثاقب نثار از خود نوٹس دا زیادہ استعمال کیتا۔وزیر قانون آکھیے بار کونسلز اتے بار ایسوسی ایشنز ایں ٻل دی حمایت کریندے پئے ۔کڄھ اہم معاملات اچ سینئر ججز کوں بینچ اچ رلایا نی ویندا پیا ، انہاں آکھیے بد قسمتی نال گزریل 3 سال توں سپریم کورٹ اچ فل کورٹ اجلاس نی تھیا ۔ سابق چیف جسٹس آصف سعید خان کھوسہ دے دور اچ از خود نوٹس دے حوالے نال اجلاس تھئے ۔ انہاں آکھیے توہین عدالت اچ وی انٹرا کورٹ اپیل دا حق اے۔ وفاقی وزیر سید نوید قمر ٻل اچ ترائے ترامیم پیش کیتیاں ۔ کمیٹی ٻل ترامیم دے نال متفقہ طور تے منظور کرڳھدا ۔ کمیٹی وکلا فلاح و بہبود و تحفظ ٻل 2023 تے وی غور کیتا ۔ ارکان متفقہ طور تے ایں ٻل دی منظوری ݙتی ۔ کمیٹی گزریل اجلاس دی میٹنگ اچ ایندی وی منظوری ݙتی ۔
