اسلام آباد۔29مارچ(اے پی پی) وزیر دفاع خواجہ محمد آصف آکھیے جو ملک دے پاور سٹرکچراچ شامل عدلیہ ، اسٹیبلشمنٹ ،میڈیا سودھے سارے سٹیک ہولڈرزرل ٻہن تاں حل نکل سڳدے ، پی ٹی آئی دے جیڑھے بندے ڳالھ مہاڑ کیتے آندن انہاں کنے مینڈیٹ ہی کائنی ہوندا ،ایں کیتے ݙو ترائے مہینے توں انہاں دے نال تھیوݨ آلیاں ملاقاتاں اچ کوئی پیشرفت کائنی تھئی۔ او اتھاں وفاقی وزیر اقتصادی امور سردار ایاز صادق دے رلے سپریم کورٹ دے ٻاہروں میڈیا نال ڳالھ مہاڑ کریندے پئے ہن ۔ وزیردفاع خواجہ محمد آصف آکھیے جو ڳالھ مہاڑ صرف ڳالھ مہاڑ دی حد تئیں تھیوݨی چاہیدی اے ، جے اساں ایں دلدل توں نکلݨا اے تاں پاور سٹرکچر دے سارے سٹیک ہولڈرز کوں رل ٻہݨا چاہیدے ، صرف سیاستدان سٹیک ہولڈرز کائنی ،75 سالہ ملکی تاریخ ݙسیندی اے جو پاور سٹرکچر اچ ٻئے وی سٹیک ہولڈرز ہن ،سارے رل تے ڳالھ مہاڑ آلے پاسے ونڄن تاں ایندے اچ کامیابی دے امکانات ہن، صرف سیاستداناں دے درمیان گفت و شنید تھیوݨی اے تاں ایندے اچ کامیابی دے امکانات نی سمجھدا ۔ انہاں آکھیے گزریل ݙو مہینے اچ رابطے تھئن ، پی ٹی آئی دی طرفوں جیڑھے بندے آندن انہاں کنے مینڈیٹ نی ہوندا او گپ شپ لاتے واپس ٹر ویندن ۔ انہاں آکھیے پاورسٹرکچر اچ عدلیہ، اسٹیبلشمنٹ تے میڈیا سٹیک ہولڈرز ہن ،اے سارے کہیں نہ کہیں صورت اچ رل ٻہن تاں حل نکل سڳدے ،۔ انہاں آکھیے آئین اچ ترامیم دے بعد کجھ بہتری آئی اے، اڄ وی عدالت اچ ایں تے بحث تھیندی پئی اے جو فیصلہ کیڑھے تناسب نال اے اساں ایں تے کمنٹ نی کرڳدے لیکن ھک کنفوژن تاں سامݨے ۔
