اسلام آباد۔3اپریل (اے پی پی) وزیراعظم محمد شہباز شریف آکھیا جو عمران خان پاکستان کوں معاشی دلدل اچ پھسا ݙتے، اساں ہمیشہ ملک کوں اوکھ توں کݙھیے، ویلھا امسی جڈاں حالات بدل ویسن اے میݙا ایمان اے، آئی ایم ایف دی چھیکڑی شرط تے ڳالھ تھیندی پی اے۔ عمران خان پاکستان کوں معاشی دلدل اچ پھسا ݙتے، دوست ملکاں دے خلاف سابق حکمراناں بدزبانی کیتی، پچھلی حکومت آئی ایم ایف پروگرام پاروں مہانگ دی لہر امدی پی اے۔ سنوار کوں مسلم لیگ (ن) دے میڈیا سیل توں جاری بیان موجب وزیراعظم شہباز شریف دی صدارت مسلم لیگ (ن) دی پارلیمانی پارٹی دا اجلاس پارلیمنٹ ہاؤس اچ تھیا۔ وزیراعظم آکھیا جو آئی ایم ایف وفاقی حکومت دے پیر بدھ ݙتن، آئی ایم ایف دی پیشگی شرطاں من ڳھدن، آئی ایم ایف دی چھیکڑی شرط تے ڳالھ تھیندی پی اے۔ انہاں آکھیا جو ݙاہ کروڑ غریب ٹبراں کوں مفت اٹا ݙیوݨ شروع کر ݙتے۔ پنجاب، خیبرپختونخوا اتے اسلام آباد اچ غریباں کوں رمضان اچ مفت اٹا ݙیندے پیوں۔ وزیراعظم آکھیا جو برادر ملک پاکستان دی وݙی مدد کریندے پن۔ انہاں آکھیا جو ملک کوں چھل دی صورتحال دا سامھا کرݨا پیا، سو ارب روپے صرف وفاق توں چھل متاثرین کوں ݙتے ڳے۔ انہاں آکھیا جو اسرائیل نال تجارت شروع کرݨ دا کوڑ کھنڈایا ویندا پے جیڑھا قابل مذمت اے، ہک بندے دا حکومت پاکستان دی پالیسی نال کیا تعلق؟ فلسطیاں کوں حقوق ملݨ تئیں پاکستان اپݨی اصولی موقف تے کاربند رہسی۔ وفاقی وزیر قانون سینیٹر اعظم نذیر تارڑ اتے وزیر خزانہ اسحاق ڈار پارلیمانی پارٹی دے اجلاس کوں بریفنگ ݙتی۔
