اسلام آباد۔4اپریل (اے پی پی) سپریم کورٹ پنجاب اتے خیبر پختونخوا اچ انتخابات ملتوی کرݨ دا الیکشن کمیشن دا فیصلہ کالعدم قرار ݙیندیں ہوئیں 15 مئی تئیں انتخابات کراوݨ دا حکم ݙے ݙتے۔ سپریم کورٹ پنجاب اتے خیبرپختونخوا اچ انتخابات دے التوا بارے کیس دا فیصلہ سݨیدیں ہوئیں الیکشن کمیشن دا 8 اکتوبر 2023ء کوں انتخابات کراوݨ دا فیصلہ کالعدم قرار ݙے ݙتے۔ منگل کوں چیف جسٹس آف پاکستان جسٹس عمر عطاء بندیال دی سربراہی اچ عدالت عظمی دے ترائے رکنی بنچ کیس دا فیصلہ سݨائے۔ چیف جسٹس قرآن پاک دی آیت پڑھ تے ابتدائی فیصلہ سݨاوݨ شروع کیتے۔ فیصلہ اچ چیف جسٹس آکھیا جو کیس دا تفصیلی فیصلہ بعد اچ جاری کیتا ویسی۔ اپݨے فیصلے اچ عدالت عظمیٰ الیکشن کمیشن دا 8 اکتوبر 2023ء کوں انتخابات کراوݨ دا حکم غیر آئینی قرار ݙے ݙتے۔ فیصلے اچ آکھیا ڳیا جو الیکشن کمیشن دا 22 مارچ 2023 ء دا فیصلہ غیر آئینی قرار ݙتا ویندے اتےصدرمملکت کوں ݙتی ڳی الیکشن دی تاریخ دا فیصلہ بحال کیتا ویندے۔ سپریم کورٹ اپݨے فیصلے اچ آکھیا جو آئین تے قانون انتخابات دی تاریخ ملتوی کرݨ دا اختیار نی ݙیندا۔ 22 مارچ کوں جئیں ویلھے الیکشن کمیشن انتخابات ملتوی کرݨ دا فیصلہ ݙتا تاں اوں ویلھے تئیں انتخابی عمل پنجویں مرحلے تے ہئی۔ الیکشن کمیشن دے حکم پاروں 13 ݙینھ ضائع تھی ڳن۔ الیکشن کمیشن غیر آئینی فیصلہ کیتے۔ الیکشن کمیشن اٹھ اکتوبر کوں الیکشن دی تاریخ ݙے تے اپݨے دائرہ اختیار توں تجاوز کیتے۔ اپݨے فیصلے اچ سپریم کورٹ قرار ݙتے جو 30 اپریل توں 15 مئی 2023ء وچال صوبائی انتخابات کرائے ونڄن۔ ریٹرننگ افیسر دے فیصلہ دے خلاف اپیلاں جمع کراوݨ دی چھیکڑی تاریخ ݙاہ اپریل کوں تھیسی۔ 17 اپریل کوں الیکشن ٹریبونلز اپیلاں تے فیصلہ کریسن۔ واضح رہوے جو سپریم کورٹ پاکستان تحریک انصاف دی درخواست تے پنجاب اتے کے پی دے انتخابات اچ تاخیر کیس دا فیصلہ 6 سماعتاں دے بعد گزریل ݙینھ محفوظ کیتا ہئی جیڑھا اڄ سݨایا ڳے۔
