اسلام آباد۔5اپریل(اے پی پی) وفاقی وزیر داخلہ رانا ثنا اللہ خان آکھیے موجودہ صورتحال اچ متنازع انتخابات داانعقاد ملک کوں افراتفری تے انارکی آلے پاسے گھن ویسی ، موجودہ حکومت ایں دے سامݨے رکاوٹ بݨ تے کھڑی اے ، انتخابات سارے فریقین دی مرضی اتے اتفاق رائے نال تھیوݨے چاہیدن ۔ او ٻدھ کوں جوڈیشل کمپلیکس اچ وکلا کنونشن توں کطاب کریندے پئے ہن ۔ وفاقی وزیر قانون و انصاف سینیٹر اعظم نذیر تارڑ ، وفاقی وزیر اطلاعات و نشریات مریم اورنگزیب ،وزیراعظم دے معاون خصوصی عطا تارڑ اتے ن لیگی قائدین وی ایں موقع تے موجود ہن۔ وکلا کنونشن دی مہمان خصوصی پاکستان مسلم لیگ ن دی سینئر نائب صدر اتے چیف آرگنائز ر مریم نواز ہن۔ وفاقی وزیر رانا ثنا اللہ خان آکھیے اڄ ایں عظیم و الشان وکلا کنوونشن دے انعقاد تے مسلم لیگ ن لائر فورم کوں مبارخ ݙینداں ، پاکستان مسلم لیگ ن ھک سیاسی جماعت دے طور تے عصر حاضر اچ ھک واضح نظریہ اتے پالیسی رکھیندی اے۔ انہاں آکھیے وکلا ہمیشہ قوم دی رہنمائی کریندے ہوئیں قوم کوں صحیح رستہ ݙکھایا اے ۔انہاں آکھیے متنازعہ انداز نال انتخابات کراوݨ دی کوشش کیتی ویندی پئی اے آکھیا ویندا پئے جو اساں انتخابات توں پیچھوں ہٹدے پیوں ، اساں انہاں کوں ݙساوݨ چاہندوں جو انتخابات توں گھبراوݨ آلے کائنی ، اساں ٻہوں سارے انتخابات لڑیے تے ہمیشہ منتخب تھی تے آئے نہ جو سلیکشن توں ۔ انہاں آکھیے سیاسی جماعتاں ، سپر یم کورٹ دے ججز دا الیکشن تے اتفاق کائنی لیکن ترائے ججاں پنجاب اچ 14 مئی دے الیکشن دا نواں شیڈول ݙے ݙتے۔ الیکشن کمیشن ،دفاعی اداریں ، سکیورٹی دے اداریں کوں ایں نال اتفاق کائنی تے چار جج ایں دے خلاف اتے ترائے حق اچ فیصلہ ݙیندے پئن۔ ساݙی رائے اے جو ایں قسم دا متنازعہ الیکشن ملک کوں افراتفری اتے انارکی دے پاسے گھن ویسی ۔
