جدہ۔5اپریل (اے پی پی) اسلامی تعاون تنظیم دے جنرل سیکرٹریٹ بھارت دی کئی ریاستاں اچ مسلماناں دے خلاف پرتشدد کاروائیاں دی شدید مذمت کیتی اے۔ کشمیر میڈیا سروس موجب او آئی سی جنرل سیکرٹریٹ ہک بیان اچ رام نومی دے جلوساں اچ بھارت دی کئی ریاستاں اچ مسلماناں کوں نشانہ ٻݨاوݨ اتے بھن تروڑ دی کاروائیاں تے تشویش کیتی اے جئیں اچ 31مارچ 2023کوں بہار شریف اچ انتہا پسند ہندواں ولوں مدرست اتے وندی لائربریری کوں بھاہ لاوݨ وی شامل اے۔ بیان اچ آکھیا ڳیا جو او آئی سی جنرل سیکرٹریٹ تشدد اتے بھن تروڑ دی انہاں اشتعال انگیز کاروائیاں دی مذمت کریندے جیڑھی جو بھارت اچ ودھدے ہوئے اسلاموفوبیا اتے مسلماناں کوں منظم طریقے نال نشانہ ٻݨاوݨ دی عکاس ہن۔ بیان موجب او آئی سی دے جنرل سیکرٹریٹ بھارتی حکام تے زور ݙتے جو او ایجھی کاروائیاں تے اکساوݨ اتے انہاں اچ ملوث عناصر دے خلاف سخت کاروائی کرن۔
