
اسلام آباد۔10اپریل(اے پی پی) وفاقی وزیر تعلیم رانا تنویر حسین آکھیے شہریاں کوں پاکستان دے آئین متعلق مکمل آگاہی ݙیوݨ دی لوڑھ اے ، ایں ضمن اچ آئین دے اہم حصیں تے تاریخ کوں تعلیمی نصاب اچ رلیندے پیوں ۔ انہاں آئین پاکستان دی 50 ویں سالگرہ تے قومی خبر رساں ادارے اے پی پی نال خصوصی ڳالھ مہاڑ کریندے ہوئیں آکھیے جو آئین پاکستان دی 50ویں سالگرہ مناوݨ خوشی دی ڳالھ اے تے او پوری قوم کوں مبارخ ݙیندن ۔ انہاں آکھیے آئین نہایت مقدس تے اہم دستاویز ہوندے جیڑھا جو ملک دا نظام چلیندے تے شہریاں دے حقوق دا تحفظ کریندے ،انہاں آکھیے شہریاں بالخصوص نویں نسل کوں آئین پاکستان متعلق مکمل طور تے آگاہی ݙیوݨ دی لوڑھ اے انہاں کوں آپݨے حقوق و فرائض دا چنڳی طرح پتہ ہووے ۔ وفاقی وزیر آکھیےآئین پاکستان دے اہم حصیں تے تاریخ کوں قومی تعلیمی نصاب اچ رلاوݨ دی حکمت عملی بݨا ڳھدی اے۔