اسلام آباد۔10اپریل(اے پی پی):وزیراعظم محمد شہباز شریف دستور پاکستان 1973 دے 50 سال مکمل تھیوݨ تے قوم کوں مبارخ ݙیندے ہوئیں آکھیے 1973 دا آئین قائد اعظم محمد علی جناح ، علامہ اقبال اتے بانیان پاکستان دی بصیرت دا نچوڑ اے جئیں قوم کوں متحد کررکھیے، تاریخ اچ پہلی واری ساریاں جماعتاں رل تے آئین دی طاقت نال ووٹ چور ،سلیکٹڈ تے مسلط کیتے ڳئے ٹولے کوں اقتدار توں کڈھ تے ٻاہر کیتا ،ملک کوں معاشی ترقی و خود انحصاری نال ہمکنار کرتے اتے ساݙے عوام دی زندگیاں اچ آسانیاں گھن آتے آئین دی طاقت اتے شان ودھیسوں ۔ سنوار کوں وزیراعظم آفس دے میڈیا ونگ توں جاری بیان موجب اے ڳالھ انہاں دستور دے 50 سال مکمل تھیوݨ تے آپݨے خصوصی پیغام اچ آکھی اے ۔وزیراعظم دستور دا تحفہ ݙیوݨ آلے سارے قائدین، جماعتاں تے ارکان پارلیمان کوں خراج عقیدت پیش کیتا۔ انہاں انہاں ساری محترم شخصیات کوں وی خراج تحسین پیش کیتے جنہاں پنجاہ سال اچ آئین دی عزت و حرمت ودھائی تے اینکوں تکڑا کرݨ اچ کردار ادا کیتے ۔وزیراعظم آکھیے 10 اپریل 1973 توں 10 اپریل 2023 تئیں دستور پاکستان قوم کوں ھک مٹھ رکھیے ، دستور ہی پاکستان اچ رہݨ آلی ساریاں قوماں دا متفقہ عمرانی معاہدہ اے ،دستور سارے ریاستی اداریں دی ماء اے ۔ انہاں آکھیے سانحات ، حادثات اتے سازشی واقعات دے باوجود آئین اپݨے وجود کوں برقرار رکھیے۔ انہاں آکھیے ذوالفقار علی بھٹو آئین دے معمار وی ہں ایں کیتے جان قربان کرݨ آلے وی ،وزیراعظم آکھیے او ایں موقع تے محترمہ بے نظیر بھٹو اتے قائد محمد نوازشریف کوں خاص طور تے سلام پیش کریندن جنہاں آئین دی سربلندی، حفاظت تے ودھارے کیتے تاریخی کردار ادا کیتے ۔
