اسلام آباد۔11اپریل (اے پی پی سرائیکی سروس)جام پور وچ سٹریٹ چلڈرن دے عالمی ڈینھ (12اپریل) دی تقریب اچ بالاں دے تحفظ تے کم کرݨ آلی غیر سرکاری تنظیماں دے اتحاد چلڈرن ایڈوکیسی نیٹ ورک (CAN Pakistan) دی ممبر تنظیم نیلاب چلڈرن اینڈوومن ڈویلپمنٹ کونسل پنجاب حکومت توں مطالبہ کیتا اے جو سٹریٹ چلڈرن دے تحفظ سانگے ٹھوس اقدامات دی جامع حکمت عملی جلدی توں جلدی بنڑائی ونجے ۔ چلڈرن ایڈوکیسی نیٹ ورک صوبہ پنجاب اچ بالاں دے تحفظ دی پالیسی دی منظوری تے نفاذ دے عمل اچ اڑاند تے پریشانی دا اظہار کریندے ہوئے اے وی مطالبہ کیتا اے جو سارے حالات اچ بالاں کوں تشدد، بدسلوکی تے استحصال توں محفوظ رکھنڑاں حکومتی ترجیحات اچ سب توں پہلے ہوونڑاں چاہیدا اے ۔
چلڈرن ایڈوکیسی نیٹ ورک دی ممبر تنظیم نیلاب دے ترجمان دا آکھنڑ ہا جو ڈوجھے بالاں وانکنڑ سٹریٹ چلڈرن وی انھاں ساریے حقوق دا حق رکھدن جیڑھےاقوام متحدہ دےمعاہدہ برائےحقوق اطفال ءچ ڈتے گئین ۔ 2017 ءچ اقوام متحدہ دی کمیٹی برائےحقوق اطفال سٹریٹ چلڈرن دے مسئلیاں کوں ترجیحی بنیاداں تے حل کرنڑ تے اُنھاں کوں بغیر فرق دے سارے حقو ق ڈیونڑ تے جنرل کمنٹ نمبر 21 وی متعارف کروایا اے جیڑھا سٹریٹ چلڈرن توں متعلق حکمت عملی دی ترتیب دے دوران حکومتاں کیتے رہنما دستاویز تھی سگدی اے ۔چلڈرن ایڈوکیسی نیٹ ورک ولوں تجویز پیش کیتی گئی اے جو سٹریٹ چلڈرن کوں تعلیم، صحت، شناخت سودھے ڈوجھے حقوق ڈیونڑ کوں یقینی بنڑاونڑ کیتے حکومت تے غیر سرکاری تنظیماں وچال تعلق کوں گھاٹا کیتا ونجے ۔ حکومت تعلیم جئیں اہم حق دی تکمیل کیتے کمیونٹی دی سطح تے پروگرامز متعارف کروائین ، سٹریٹ چلڈرن دے مسئلیاں کوں درست ماہرانہ انداز ءچ سمجھنڑ سانگے حکومتی سر پرستی اچ سروے کروایا ونجے تاں جو مسئلیاں کوں سمجھنڑ دے نال نال انھاں دے حل کیتے درست سمت اچ اقدامات کیتے ونجن ۔ نو عمر افراد کو ہنر مندی دے پروگرامز دے دائرے اچ گھن آونڑ کیتے معیارات اچ نرمی کیتی ونجے کیوں جو زیادہ تر سٹریٹ چلڈرن تعلیم دے مطلوبہ معیار تے پورا نی لہہ سگدے ۔ سٹریٹ چلڈرن کوں بدسلوکی تے استحصال توں محفوظ رکھنڑ کیتے آگاہی پروگرام مستقل بُنیاداں تے چلائے ونجن ، خاص طور تے انھاں دے بالاں دے ماء پیو تے ڈوجھے وڈیاں کوں وی بالاں کوں ممکنہ طور تے آونڑ آلے خطریاں بارے ڈسایا ونجے کیوں جو سڑکاں تے ہوونڑ یارہونڑ دی وجہ توں انھاں بالیں کوں تشدد ، بدسلوکی تے استحصال دا خطرہ ودھ ویندے ۔
