فیصل آباد۔11اپریل(اے پی پی) داماد نبی آخر الزماں ؐ، شیر خدا، امام المتقیان حضرت علی المرتضی ؓ ابن ابی طالب ؑ دا یوم شہادت اڄ 21رمضان المبارک ٻدھ بمطابق12اپریل کوں عقیدت و احترام نال منایا ویسی ۔ ایں موقع تے فیصل آبادڈویژن دے چارے ضلعیں فیصل آباد، جھنگ، ٹوبہ ٹیک سنگھ، چنیوٹ سودھے ملک دے سارے شہراں اچ مسیتاں، امام بارگاہواں اتے ٻیاں جہیں تے خصوصی تعزیتی تقریبات سودھے سیمینارز، کانفرنسز، مذاکریں دا وی انعقاد کیتا ویسی جیں توں مختلف مکاتب فکر دے نامور علماء کرام، جید مشائخ عظام، ممتاز مذہبی سکالر، ذاکرین اہلبیت خطاب کریسن ۔ ایں موقع تے حضرت علی کرم اللہ وجہہ دی دین اسلام کیتے خدمات، لازوال قربانیاں، سیرت طیبہ تے تفصیلی روشنی پاتی ویسی ۔حضرت علی المرتضیٰ ؓ دے یوم شہادت تے پورے ملک دیاں مسیتاں اچ قرآن خوانی دا اہتمام کیتا ویسی ۔ ایں موقع تے قائد ملت جعفریہ اپݨے پیغام اچ آکھیے حضرت علی ؓ دے افکار و نظریات، تعلیمات و فرمودات پوری انسانیت کیتے مشعل راہ ہن ۔انہاں آکھیے اساکوں حضرت علی ؓ وانڳوں زندگی گزارݨی چاہیدی اے ۔ انہاں آکھیے او شہادت حضرت علی المرتضی ؓ دے پرغم موقع تے خانوادہ رسالت کوں دلی تعزیت پیش کریندے ہوئیں عہد و پیمان کریندن مظلوم دی حمایت اتے ظالم توں عملی بے زاری کیتے اپݨی جدو جہد جاری رکھیسن۔
