اسلام آباد۔12اپریل (اے پی پی):پاکستان دا آپریشن سوفٹ ریٹارٹ دے دوران بھارتی MI-17 ہیلی کاپٹر ڈھائے ونڄݨ بارے دعویٰ ’’سچ ثابت‘‘تھئے۔بھارتی فضائیہ دے گروپ کیپٹن سمن رائے چوہدری دی کورٹ مارشل رپورٹ بھانڈہ پھوڑ ݙتے۔گروپ کیپٹن سمن رائے چوہدری اتے ونگ کمانڈر شیام نیتھانی پاک فضائیہ دی جوابی کارروائی دے دوران “گھبراہٹ” اچ آپݨا ہی ہیلی کاپٹر مار ڈھایا ہئی ۔ میڈیا رپورٹس موجب بھارتی فضائیہ دا گروپ کیپٹن اپݨی ہی قیادت دے بلنڈر دی بھینٹ چڑھ ڳیا۔بھارتی فضائیہ دی طرفوں گروپ کیپٹن سمن رائے چوہدری کوں’’کورٹ مارشل‘‘ اتے ونگ کمانڈر شیام نیتھانی کوں Severe Reprimand دی سزا سݨا ݙتی ڳئی اے ۔ہیلی کاپٹر ڈھائے ونڄݨ دے نتیجے اچ بھارتی ایئرفورس دے 6 اہلکاراں سودھے 7 بندے ہلاک تھئے ہن ۔ گروپ کیپٹن سمن رائے چوہدری تے حکم عدولی کرݨ تے بد حواسی اچ میزائیل یونٹ کوں آپݨا ہی ہیلی کاپٹر مار ڈھاوݨ تے کورٹ مارشل کیتا ڳئے ۔ گھبراہٹ تے پریشانی دے عالم اچ ݙتے ڳئے احکامات توں بھارتی فضائیہ کوں 133.3 کروڑ دا نقصان پڄا ۔ پاکستان دی انٹیلیجنس ایجنسیاں اوں ویلھے بھارتی بلنڈر دا بھانڈا پھوڑا ݙتا ہئی جیں کوں بھارت مسترد کریندے ہوئیں من گھڑت اتے جھوٹ قرار ݙتا ہئی ۔
