ملتان۔12اپریل (اے پی پی) محکمہ سروسز ساوتھ پنجاب ولوں سول سیکرٹریٹ دی منصوبے دی مانیٹرنگ دے مثبت نتائج سامھے امدے پن۔ سول سیکرٹریٹ کمپلیکس جنوبی پنجاب دے منصوبے تے کم دی رفتار تکھا کر ݙتا ڳیا اتے پراجیکٹ تے لیبر اتے انجینئر دی تعداد ودھا ݙتی ڳی اے اتے میٹریل دی دستیابی کوں وی یقینی ٻݨایا ویندا پے۔ سیکرٹری سروسزجنوبی پنجاب امجد شعیب خان ترین دی صدارت اچ متی تل سائٹ تےجائزہ اجلاس تھیا جئیں اچ ڈپٹی سیکرٹری عبدلصبور ٹھاکر،سیکشن آفیسر محمداحمدخان اتے ٻے افسر دے علاوہ آئی ڈیپ دے پراجیکٹ ڈائریکٹر میجر(ر)محمد فیصل،ریذیڈنٹ انجئنیر تجمل حسین اتے کنسٹرکشن کمپنی دی انتظامیہ شریک تھئی۔ اجلاس اچ ہر ݙینھ دی پراگرس چیک کرݨ کیتے چھی افسراں دی سب کمیٹی ٻݨاوݨ دا اعلان کیتا ڳے۔ سول سیکرٹریٹ دا منصوبہ وی 6 زون اچ تقسیم کر ݙتا ڳے اتے ہر افسر کوں منصوبے دے متعلقہ زون بارے رپورٹ پیش کرݨ دی ہدایت کر ݙتی ڳی اے۔ سیکرٹری سروسز جنوبی پنجاب سول سیکرٹریٹ تے جاری کم دا معائنہ وی کیتا۔ 500 کنال قطعہ اراضی تے ٻݨݨ آلے سول سیکرٹریٹ جنوبی پنجاب دے منصوبے تے3 ارب 50 کروڑ روپے خرچ کیتے ویندے پن۔
