ڈیرہ غازی خان۔12اپریل (اے پی پی) وزیراعظم محمد شہباز شریف آکھیا جو ملک اوکھے حالات اتے چیلنجز اچ اے، عوام دی فلاح و بہبود، خوشحالی اتے ریلیف کیتے کوشش کریندے پیوں، اتحادی حکومت ملک کوں اوکھ توں کݙھیسی، ملک کوں حقیقی معنیاں اچ قائد اتے اقبال دے خواباں دا پاکستان ٻݨیسوں۔ بدھ کوں ڈیرہ غازی خان اچ مفت اٹا تقسیم کرݨ دے مرکز دے دورہ تے موقع تے ڳالھ مہاڑ کریندیں ہوئیں وزیراعظم آکھیا جو پنجاب اچ وزیراعلیٰ محسن نقوی اتے صوبائی حکومت دی نگرانی اچ مفت اٹا تقسیم تھیندا پے۔ انہاں آکھیا جو ملک دی تاریخ اچ پہلی واری رمضان المبارک اچ مفت اٹا دی تقسیم دا وݙا پیکیج ݙتا ڳے۔ رمضان المبارک دے بعد دکاناں تے سستے اٹا ݙیوݨ تے غور کیتا ویسی۔ عوام دی فلاح و بہبود، خوشحالی اتے بحالی اساݙا پہلا فرض اے جئیں کیتے وفاقی اتے صوبائی حکومتاں رل تے کم کریسن۔ اٹے دی مفت فراہمی کیتے بہترین اقدامات تے چیف سیکرٹری پنجاب، راجن پور، لیہ، مظفرگڑھ اتے ڈیرہ غازی خان دی انتظامیہ دے اقدامات قابل تحسین ہن، اﷲ تعالیٰ اساکوں ہمت ݙیوے جو اساں پاکستان دی عوام دی خدمت کروں۔
