اسلام آباد۔19اپریل(اے پی پی) وزیراعظم محمد شہباز شریف کارنیٹ ڈی پیسج سکیم دے تحت گھن آئی ونڄݨ آلی تے غیر قانونی زیر استعمال لگژری گاݙیاں وختی ضبط کرݨ دے احکامات جاری کریندے ہوئیں آکھیے جو سکیم دے غیر قانونی اتے ناجائزاستعمال تے غفلت دے مرتکب اہلکاراں دے خلاف سخت کارروائی کیتی ویسی ۔ اے ڳالھ انہاں کارنیٹ ڈی پیسجز سکیم دے تحت گھن آئی گاݙیاں دے معینہ مدت توں ودھ تے غیر قانونی استعمال دا سخت نوٹس گھندے ہوئیں اسلام آباد اچ ھک خصوصی اجلاس دی صدارت کریندے ہوئیں آکھی اے ۔ اجلاس تے ملک اچ لگژری گاݙیاں دے داخلے اتے اخراج دے طریقہ کار تےبریفنگ ݙتی ڳئی۔اجلاس اچ وفاقی وزیر داخلہ رانا ثنا اللہ، وفاقی وزیر تجارت سید نوید قمر ، وزیرِ اعظم دے معاون خصوصی خزانہ طارق باجوہ تے متعلقہ سرکاری افسران شرکت کیتی۔اجلاس اچ ایجھیاں لگژری گاݙیاں دی نشاندہی وی کیتی ڳئی جیڑھیاں کارنیٹ ڈی پیسج دی سہولت دے تحت پاکستان اچ گھن آئیاں ڳن تے طے شدہ مدت پوری تھی ونڄݨ دے باوجود استعمال تھیندیاں پئن جیں تے وزیرِ اعظم کاوڑ کریندے ہوئیں ایجھیاں ساریاں ڳاݙیاں کوں وختی ضبط کرݨ دے احکامات جاری کیرتے ۔ ایں ضمن اچ وزیرِ اعظم ھک کمیٹی بݨاوݨ دی ہدایت کیتی جیڑھی ایں سارے معاملے دی تحقیقات کرتے ذمے واراں دا تعین کریسی ۔
