اسلام آباد۔19اپریل(اے پی پی) وزیراعظم محمد شہباز شریف آکھیے حکومت کساناں دی فی ایکڑ لاڳت گھٹ کرݨ کیتے ہرممکن اقدام کریندی پئی اے ،ملک اچ یوریا دی وختی پیداوار اتے ایندی کساناں تئیں ترسیل یقینی بݨائی ونڄے ،یوریا سمگلنگ توں کہیں کوں کساناں دے حق تے ڈاکہ مارݨ نہ ݙیساں ، نیلم جہلم منصوبے دی بحالی تے کم دی رفتار تکھی کیتی ونڄے ۔ اے ڳالھیں انہاں اتھاں ٻدھ کوں ملک اچ یوریا کھاد دی پیداوار و کھپت اتے موسم انہالے اچ بجلی دی لوڈشیڈنگ حوالے نال اجلاس دی صدارت کریندے ہوئیں آکھئن۔ اجلاس اچ سابق وزیراعظم شاہد خاقان عباسی، وفاقی وزراء طارق بشیر چیمہ، مخدوم سید مرتضی محمود، خرم دستگیر خان، وزیرمملکت ڈاکٹر مصدق ملک، مشیرِ وزیر اعظم احد خان چیمہ، معاونینِ خصوصی جہانزیب خان، طارق باجوہ اتے متعلقہ اعلی حکام شرکت کیتی۔اجلاس کوں ملک اچ یوریا کھاد دی پیداوار اتے کھپت دے اعداد و شمار دے نال نال یوریا صنعت کوں گیس ݙیوݨ تے تفصیلی بریفنگ ݙتی ڳئی ۔ وزیراعظم آکھیے گزریل ھک سال اچ حکومت کساناں دی خوشحالی تے شعبہ زراعت دی ترقی کوں آپݨی اولین ترجیح بݨائے ،یوریا کھاد دی طلب و رسد دی کڑی نگرانی کیتی ونڄے ۔
