اسلام آباد۔19اپریل(اے پی پی)وزیر اعظم محمد شہباز شریف ملک گیر سولرآئیزیشن منصوبے تے کم تیکھا کرݨ دی ہدایت کریندے آکھیے جو پاکستان ڄھیاں ترقی پذیر ملک مہانگے درآمدی ایندھن نال بجلی دی پیداوار دا متحمل نئیں تھی سڳدا، سولر پینلز دی مرحلہ وار درآمد یقینی ٻݨائی وںجے جو سستی بجلی نال لوکاں کوں فیدہ تھیوے۔ او ملک گیر سولرآئیزیشن منصوبے بارے جائزہ اجلاس دی اڳواݨی کریندے پئے ہن۔ وزیرِ اعظم اسٹیٹ بنک اتے متعلقہ حکام کوں سولر پینلز اتے ایندے آلات دی درآمد کیتے رکاوٹاں دور کرݨ دی دہایت کیتی۔ انہاں آکھیا جو ڳھٹ لاگت شمسی بجلی دی پیداوار نال ایندھن کیتے کرچیڄݨ آلے قیمتی زرمبادلہ دی بچت تھیسی۔ اجلاس اچ سرکاری عمارتاں دی سولرائزیشن کیتے اڳونہی دی تفصیل وی ݙسائی ڳئی۔ اجلاس اچ 600 میگاواٹ کوٹ ادّو منصوبے دی ٹینڈرنگ اتے بین الاقوامی کمپنیاں دی سرمایہ کاری بارے ݙسایا ڳیا جو لیہ اچ 1200 میگا واٹ اتے جھنگ اچ 600 میگاواٹ دے منسوبے حتمی مراحل اچ ہین، 11 کے-وی فیڈرز تے سولر لاوݨ کیتے نیپرا توں پینچ مارک ٹیرف منظوری دے بعد اڳونہی تھیسی۔ اجالس اچ سابق وزیرِ اعظم شاہد خاقان عباسی، وفاقی وزیر صنعت و پیداوار سید مرتضی محمود، وزیرِ مملکت پٹرولیم ڈاکٹر مصدق ملک، مشیر وزیرِ اعظم احد خان چیمہ، معاونین خصوصی جہانزیب خان، طارق باجوہ اتے متعلقہ اعلی حکام موجود ہن۔
