راولپنڈی۔25اپریل(اے پی پی) پاک فوج دے ترجمان میجر جنرل احمد شریف چوہدری آکھیے پاکستان دی داخلی اتے بارڈر سیکورٹی کوں یقینی تے دَائمی بݨاوݨ کیتے اساں مُکمل طور تے متوجہ ہیسے ، دہشتگردی دے خلاف ساݙی کامیاب جنگ آخری دہشتگرد مکاوݨ تئیں جاری رہسی ، عوام دے تعاون نال اساں ہر چیلنج تے قابو پا گھنسوں تے وطن عزیز کوں مستحکم اتےدَائمی امن دا گہوارہ بݨیسوں، پاک فوج غیر سیاسی ادارہ اے ، افواج پاکستان اتے منتخب حکومت دا غیر سیاسی اتے آئینی رشتہ ہوندے اینکوں سیاسی رنگ ݙیوݨ مناسب ڳالھ کائنی ،افواج پاکستان کہیں خاص سیاسی سوچ اتے جماعت دی نمائندگی نی کریندی ، الیکشن کیتے فوج دی تعیناتی بارے وزارت دفاع زمینی حقائق دے مطابق اپݨا جواب الیکشن کمیشن اتے سپریم کورٹ اچ پیش کرݙتے ،قانون دی بالادستی اتے پاسداری نال ہی معاشرے ترقی کریندن ، افواجِ پاکستان بھارت دی انہاں ساری شر انگیزیاں نال نبݨݨ کیتے ہر ویلھے تیار تے کہیں وی جارحیت دا جواب ݙیوݨ کیتے پرعزم اے ۔ او آئی ایس پی آر ڈائریکٹوریٹ اچ پریس کانفرنس توں خطاب کریندے پئے ہن ۔ ڈی جی آئی ایس پی آر میجر جنرل احمد شریف چوہدری آکھیے پریس کانفرنس دا مقصد افواج پاکستان دی پیشہ ورانہ سرگرمیاں اتے اڄوکے دہشتگردی دے خلاف کیتے ونڄݨ آلے اِقدامات دا احاطہ کرݨا ہئی ۔ پریس کانفرنس اچ اڄوکے سال سیکیورٹی اتے دہشتگردی دے اہم معاملات تے روشنی پاتی ویسی ۔ انہاں ݙسایا جو پاک بھارت ڈی جی ایم او دے درمیان رابطےدے دوران سیز فائر لائن معاہدے دے بعد دی صورتحال بہتر رہی اے ۔ہندوستانی لیڈر شپ دی گیدڑ بھبکیاں اتے لائن آف کنٹرول تے دراندازی، تکنیکی فضائی خلاف ورزیاں اتے ٻئے الزامات دا لگاتار کوڑا پراپیگنڈہ ،بھارت دے ھک خاص سیاسی ایجنڈے دی عکاسی کریندے ۔ پاکستان ہمیشہ اقوام متحدہ دے قائم کیتے ڳئے گروپ نال تعاون کیتا، لائن آف کنٹرول تے مکمل رسائی ݙتی ڳئی ، بھارت دی طرفوں ایجھا کجھ نی کیتا ڳیا ، بین الاقوامی میڈیا، او آئی سی سیکرٹری جنرل سودھے 16 دورے کرائے ڳن ۔ اڄوکے سال بھارت دی طرفوں ہݨ تئیں 56 واری چھوٹی سطح تے مختلف سیز فائر دی خلاف ورزیاں کیتیاں ڳن جنہاں اچ 22 سپیکیولیٹو فائر، فضائی حدود دی 3خلاف ورزی ، فائر بندی دے 6 چھوٹے اتے ٹیکنیکل فضائی خلاف ورزیاں دے 25 واقعات شامل ہن ۔ ایں عرصے وچ پاک فوج 6 جاسوس کواڈ کاپٹرز کوں وی مار ڈھائے ۔ افواجِ پاکستان بھارت دی شرانگیزیاں نال نبݨݨ کیتے ہر ویلھے تیار تے کہیں وی جارحیت دا بھرپور جواب ݙیوݨ کیتے پرعزم ہن ۔ پچھلے کجھ عرصے توں دہشت گرد بلوچستان اتے کے پی کے اچ دہشت گردی کریندے پئن ، پاکستان دی داخلی اتے بارڈر سیکورٹی یقینی اتے دَائمی بݨاوݨ کیتے اساں مُکمل طور تے متوجہ ہیسے ۔ افغانستان توں امریکی افواج دے انخلاء دے بعد افغانستان اچ تھیوݨ آلیاں تبدیلیاں دے نتیجے اچ دہشتگردی دے واقعات ودھ ڳئن ، اڄوکے سال مجموعی طور تے نکے وݙے دہشتگردی دے436 واقعات تھئن جنہاں اچ 293 لوک شہید جݙاں جو 521 زخمی تھئن ۔ خیبر پختو نخوااچ 219 واقعات اچ 192 شہید جݙاں جو 330 زخمی تھئن، بلوچستان اچ 206 واقعات اچ 80 شہید جݙاں جو 170 زخمی تھئن ، پنجاب اچ دہشت گردی دے 5 واقعات تھئن جنہاں اچوں 14 شہید جݙاں جو 3 زخمی تھئن ۔اڄوکے سال سیکورٹی فورسز دہشتگرداں اتے انہاں دے سہولت کاراں دے خلاف 8269 چھوٹے وݙے انٹیلی جنس بیسڈ آپریشنز کیتے ایں دوران لڳ بھڳ 1535 دہشتگرداں کوں واصل جہنم یا گرفتار کیتا ڳئے۔ ڈی جی آئی ایس پی آر ݙسائے جو دہشتگردی دے ناسور نال نبݨݨ کیتے روزانہ 70 توں ودھ آپریشنز افواج پاکستان، پولیس اتے دیگر قانون نافذ کرݨ آلے ادارے انڄام ݙیندے پئں ،اڄ الحمداللہ عوام اتے افواجِ پاکستان دی لازوال قربانیاں دی بدولت پاکستان کوں کوئی نوگو ایریا کائنی ۔انہاں آکھیے مختلف علاقیں اچ کجھ دہشت گرد سرگرم عمل اے جنہاں دی روزانہ سرکوبی کیتی ویندی پئی اے ۔ پشاور مسجد اچ دھماکہ اتے کراچی واقعہ واضح کریندے جو انہاں دہشت گرداں دا ریاست پاکستان اتے دین اسلام نال کوئی تعلق کائنی ۔ شواہد توں سامݨے آئے جو اے دہشت گرد افغانی ہئی ، مزید دہشت گرداں جنہاں دی تربیت تھئی ہئی انہاں کوں گرفتار کیتا ڳئے ،انہاں دی تربیت کنڈر ، دوردانہ اتے نولے اچ تھئی ،حملہ آور دا تعلق قندوز توں ہئی ۔ حملے دی منصوبہ بندی اتے عمل درآمد کیتے 75 لکھ روپے ݙتے ڳئے۔ ݙو حملے نمازی گھٹ تھیوݨ تے موخر جݙاں جو تریجھی واری دھماکہ کرایا ڳئے ۔ دہشت گردی مکاوݨ کیتے افواجِ پاکستان، انٹیلی جنس ایجنسیاں ، قانون نافذ کرݨ آلے ادارے دی صلاحیتاں تے کوئی شک نی ہووݨا چاہیدا ۔ انہاں ݙسائے جو بارڈر مینجمنٹ دے تحت 2611 کلومیٹر پاک افغان سرحد تے 98 فیصد توں ودھ کم مکمل کرڳھدا ڳئے ۔ جݙاں جو پاک ایران بارڈر تے 85 فیصد توں ودھ کم مُکمل تھی چکیے ۔ھک سوال دے جواب اچ انہاں آکھیے پاک فوج متعلق خبر کیتے آئی ایس پی آر دی پریس ریلیز تے توجہ ݙتی ونڄے تاں میڈیا اضطرابی سوالاں دے پاسے کائناں ویسی ۔ انہاں آکھیے پاک فوج دے چین دی فوج نال پراݨے ، روایتی اتے پیشہ وارانہ تعلقات ہن ،آرمی چیف دا اڄوکا دورہ چین وی ایں تناظر وچ ہے ۔
