سکھر۔ 27 اپریل (اے پی پی) کراچی توں لاہور ونڄݨ آلی ریل ڳاݙی کراچی ایکسپریس اچ بھاہ لڳݨ دے واقعے دے پنج گھنٹے بعد ریلوے ٹریک بحال کرݙتا ڳئے، خیرپور اسٹیشن سودھے ٻئے اسٹیشنس تے کھڑی مسافر ریل ڳاݙیاں کوں ریلوے ٹریک بحال کرتے اپݨی اپݨی منزل تے روانہ کرݙتا ڳئے۔جاں بحق لوکاں دی تعداد 7 ݙسائی ویندی پئی اے ۔ 26 اتے 27 اپریل دی درمیانی شب ساڈھے 12 وڄے کراچی توں لاہور ونڄݨ آلی کراچی ایکسپریس دی اے سے بزنس کوچ اچ بھاہ لڳݨ دی اطلاع ملی جیں تے وختی گاݙی کوں ٹنڈو مستی خان سٹیشن دے نیڑے روک ڳھدا ڳیا۔ ہنگامی طور تے فائر بریگیڈ کوں اطلاع ݙتی ڳئی جیں دی پہلی گاݙی رات ھک وڄ تے پنجاہ منٹ تئیں موقع تے پڄی ۔ تقریباً چالیھ منٹ دی تگ و دو دے بعد بھاہ تے قابو پاتا ڳئے، ایں دوران ݙو مسافر جاں بحق تھئن جݙاں جو چار مسافر کوچ توں لا پتہ ہن جنہاں دی تلاش جاری اے۔ ستر سالہ رابعہ بی بی متاثرہ کوچ توں ٹرپ مارݨ تے شدید زخمی تھئی اے تے زخماں دی تاپ نہ جھل سڳی تے جاں بحق تھیوݨ آلے ݙوجھے مسافر دی حالی تئیں شناخت نی تھی سڳی ۔ آکھیا ویندا پئے جیڑھے لوک لاپتہ ہن او وی جاں بحق تھی ڳئن ۔ ڈی ایس سکھر، ڈی سی او سکھر اتے ٻئے ریلوے افسران موقع تے موجود رہیے اتے صورتحال دی نگرانی اتے وزارت اچ رپورٹ کریندے رہیے ۔ ہݨ تئیں جاں بحق لوکاں دی تعداد ست تھی چکی اے جنہاں اچ ترائے ٻال وی شامل ہن۔
