سپیکر و ڈپٹی سپیکر قومی اسمبلی دا کراچی ایکسپریس دی ٻوڳھی اچ بھاہ لڳݨ پاروں تھیوݨ آلے جانی ضیان تے ݙکھ تے افسوس

 

اسلام آباد۔27اپریل  (اے پی پی):سپیکر و ڈپٹی سپیکر قومی اسمبلی خیر پور دے نیڑے کراچی توں لاہور ونڄݨ آلی کراچی ایکسپریس دی ٻوگھی اچ بھاہ لڳݨ دے نتیجے اچ تھیوݨ آلے جانی ضیان تے ݙکھ تے افسوس کیتے ۔ قومی اسمبلی سیکرٹریٹ توں جاری بیان موجب سپیکر قومی اسمبلی راجہ پرویز اشرف اتے ڈپٹی سپیکر زاہد اکرم درانی  حادثے اچ جاں بحق تھیوݨ آلیں دے لواحقین نال دلی ہمدردی دا اظہار کیتے۔ انہاں اللہ تعالیٰ توں مرحومین دی مغفرت اتے لواحقین کوں ایں ناقابل تلافی نقصان کوں برداشت کرݨ کیتے حوصلہ اتے ہمت  عطا فرماوݨ دی دعا کیتی ۔سپیکر اتے ڈپٹی سپیکر زخمیاں دی وختی صحت یابی دی دعا اتے متعلقہ حکام کوں زخمیاں کوں بہترین طبی سہولتاں ݙیوݨ دی ہدایت وی کیتی ۔