اسلام آباد۔28اپریل (اے پی پی):وزیراعظم محمد شہباز شریف آکھیے پاکستان امن چاہندے ،ساݙی امن دی خواہش کوں کمزوری نہ سمجھیا ونڄے ،بھارت اپݨے غیر قانونی زیر تسلط جموں و کشمیراچ انسانی حقوق دی سنگین خلاف ورزیاں کریندا پئے ، عالی معاشی بحران توں پاکستانی عوام کوں متاثرنہ تھیوݨ ݙیسوں ۔ اے ڳالھ انہاں پی اے ایف اکیڈمی اصغرخان رسالپوراچ پاسنگ آئوٹ پریڈ تقریب توں بطورمہمان خصوصی خطاب کریندے ہوئیں آکھی اے ۔ انہاں آکھیے پاس آئوٹ تھیوݨ آلے کیڈٹس تے انہاں دے والدین کوں مبارخ ݙینداں ،پاک فضائیہ دی اکیڈمی اچ اعلیٰ معیار اتے ڈسپلن ݙیکھ تے خوشی تھئی اے ،پاس آئوٹ تھیوݨ آلے کیڈٹس مستقبل دا اثاثہ ہن، انہاں کیڈٹس کوں کامیابی انہاں دی مسلسل محنت تے غیرمتزلزل عزم پاروں ملی اے ، پاک فضائیہ کہیں وی چیلنج اچ ملک دا ناں روشن کیتے ، پاک فضائیہ دنیا اچ بے مثال مہارت دی حامل اے۔ انہاں آکھیے پاک فضائیہ فروری 2019 اچ بھارتی جارحیت دا منہ بھن جواب ݙتا ،گزریل ݙو عشریں دے دوران قوم دہشت گردی ، انتہاپسندی اتے شدت پسندی دا سامݨا کیتا، پاک فوج سودھے سارے قانون نافذ کرݨ آلے اداریں ایں ناسور دا جوانمردی نال مقابلہ کیتے ،پوری قوم افواج پاکستان دی پشت تے کھڑی اے ، یقین اے جو مسلح افواج ہمیشہ قوم دی امنگاں تے پوری لہسی ۔ انہاں آکھیے بہترین منظم تے پیشہ ور پاک فضائیہ دی سربراہی تے پاک فضائیہ دے سربراہ ایئر چیف مارشل ظہیر احمد بابر سدھو کوں مبارخ ݙینداں ۔ ایں موقع تے وزیراعظم پاس تھیوݨ آلے کیڈٹس کوں بیج لاتے ۔ انہاں گارڈ آف آنر دا معائنہ وی کیتا۔تقریب اچ وزیر دفاع خواجہ محمد آصف، وفاقی وزیر اطلاعات ونشریات مریم اورنگزیب،پاک فضائیہ دی سربراہ ایئر چیف مارشل ظہیر احمد بابر سدھو تے اعلیٰ سول و فوجی حکام شرکت کیتی۔
