اسلام آباد۔4مئی (اے پی پی) وفاقی وزیر برائے خزانہ سینیٹر محمد اسحاق ڈار آکھیا جو پاکستان ورلڈ بینک نال پائیدار ترقی دے سانجھے اہداف ڳھنݨ کیتے رَل تے کم کرݨ کوں خصوصی اہمیت ݙیندے۔ اے ڳالھیں انہاں خمیس کوں عالمی بینک دی نائب صدر برائے انسانی ترقی ممتا مورتی دی سربراہی اچ وفد نال فنانس ڈویژن اچ ملاقات اچ آکھی۔ وزیر اعظم دے معاون خصوصی برائے خزانہ طارق باجوہ، معاون خصوصی برائے ریونیو طارق محمود پاشا، سیکریٹری خزانہ، سپیشل سیکریٹری خزانہ، اتے فنانس ڈویژن دے ٻے سینئر افسر اجلاس اچ شریک تھیے۔ وزیر خزانہ عالمی بینک برائے انسانی ترقی دے نائب صدر دا خیرمقدم کیتا اتے پاکستان دے وݙے ترقیاتی سانجھے داراں اچوں ہک دے طور تے عالمی بینک دے کردار دی تعریف کیتی۔ وزیر خزانہ پاکستان اچ عالمی بینک دے ترقیاتی منصوبیاں دی تعریف کیتی اتے ملک دی ترقیاتی لوڑھ کوں پورا کرݨ کیتے عالمی بینک ولوں ݙتی ڳی مالی اتے تکنیکی مدد تے شکریہ ادا کیتا۔ نائب صدر مورتی انسانی سرمائے اچ سرمایہ کاری دی اہمیت تے زور ݙتا۔
