اسلام آباد۔4مئی (اے پی پی) وزیر اعظم محمد شہباز شریف اپݨی ولولہ انگیز اتے انتھک کوششاں نال عالمی برادری کوں ماحولیاتی تبدیلیاں دے تباہ کن اثرات نال فوری طور نبڑݨ کیتے کامیابی نال متحرک کرݨ اچ قائدانہ کردار ادا کیتے۔ انہاں ماحولیاتی تبدیلیاں دے اثرات نال نبڑݨ دی عالمی کوششاں دی قیادت ہک ایجھے ویلھے کیتی جݙاں پاکستان کوں تاریخی مون سون چھل دی شکل سنگین نوعیت دے تباہ کاریاں دا سامݨا تھیا۔ ملک اچ چھل پاروں کئی علاقے پاݨی تلوں آئے جئیں نال انسانی ضیان تھیا، 33 ملین لوک متاثر تھیے اتے 30 بلین ڈالر توں ودھ دا وݙا ضیان تھیا۔ وزیراعظم موثر طریقے نال دنیا کوں ݙسیا جو ترقی یافتہ ملکاں دے ٻݨائے ڳے موسمیاتی اثرات نال قدرتی آفات تھیندن جئیں دا پاکستان سامݨا کریندا پے اتے او مستقبل اچ ݙوجھے خطیاں کوں وی اپݨی ولھیٹ اچ ڳھن سڳدن۔ وزیر اعظم گزریل سال شرم الشیخ اچ اقوام متحدہ دے فریم ورک کنونشن آن کلائمیٹ چینج بارے 27ویں کانفرنس آف پارٹیز (کاپ-27) اچ حصہ ڳھدا اتے سانجھی صدارت دے فرائض ادا کیتے اتے بین الاقوامی برادری دی حمایت حاصل کیتی۔ ایں توں پہلے ماحولیاتی تبدیلی دے ایکشن پلان تے وزیر اعظم دی فعال قیادت اتے عالمی کوششاں دے اعتراف دے طور ، اقوام متحدہ دی ماحولیاتی تبدیلی کانفرنس کاپ-27 انہاں کوں کانفرنس دی وائس چیئرمین شپ ݙتی جئیں دی وزیراعظم مصر دے دورہ اتے نارورے دے وزیراعظم نال سانجھی صدارت کیتی۔ اقوام متحدہ دی کانفرنس آف پارٹیز (کاپ-27) دا نائب صدر ٻݨݨ ماحولیاتی تبدیلی نال نبڑݨ کیتے پاکستان دی قیادت اچ کیتی ڳی کوششاں دا عالمی سطح تے اعتراف ہئی۔ اقوام متحدہ دے 195 رکن ملکاں اچوں پاکستان کوں اے اعزاز وزیر اعظم شہباز شریف دی عالمی اتے علاقائی فورمز تے موسمیاتی ایکشن پلان دی لوڑھ بارے کیتی ڳی کوششاں دے نیتجے اچ ملیا۔ مختلف سربراہان حکومت ایں میگا کلائمیٹ چینج سمٹ دے موقع تے وزیر اعظم نال اپݨی ڳالھ ماہڑ اچ چھل توں متاثرہ علاقیاں اچ انہاں دی مسلسل موجودگی کوں ہک “غیر معمولی کم” قرار ݙتا۔ وزیراعظم متحدہ عرب امارات دے شیخ محمد بن زید النہیان، تاجکستان دے صدر امام علی رحمان، انڈونیشیا دے نائب صدر معروف امین، عراق دے صدر عبدالرشید راشد اتے لبنان دے وزیراعظم نجیب میقاتی نال ملاقاتاں اچ عالمی برادری دی توجہ موسمیاتی تبدیلیاں توں لاحق خطریاں تے قابو کرݨ دی کوششاں اچ پاکستان دی مدد کرݨ آلے پاسے ݙوائی۔ اپݨٰی تقریراں اچ انہاں پاکستان کوں چھل پاروں تھیے آلے ضیان کوں اجاگر کیتا۔ انہاں امید کیتی جو اقوام متحدہ دی 27ویں موسمیاتی تبدیلی کانفرنس (کاپ-27) ماحولیاتی انصاف ڳھنݨ کیتے اہم ثابت تھیسی۔ تقریباً 200 ملکاں دے مندوبین مصر اچ منعقدہ اقوام متحدہ دے موسمیاتی سربراہی اجلاس اچ شریک تھیے جئیں اچ ہک معاہدے دی صورت غریب ملکاں کوں گلوبل وارمنگ نال ودھدے ہوئے ضیان دی تلافی کرݨ تے ڳالھ کیتی ڳی۔ وزیراعظم شہباز شریف چھل توں متاثرہ پاکستان دی حلات زار بارے عالمی برادری کوں ݙسیندیں ہوئیں آکھیا جو ملک کوں قرضیاں دی نی ودھیکی فنڈنگ دی لوڑھ اے۔ اساکوں ہک لچکدار اتے موافق انفراسٹرکچر کوں ولا ٻݨاوݨے۔ انہاں آکھیا جو چھل 8000 کلومیٹر توں ودھ دی سڑکاں تباہ کر ݙتن، ترائے ہزار کلومیٹر توں ودھ ریلوے ٹریک دا ضیان تھیے اتے 40 لکھ ایکڑ توں ودھ دی فصلاں وہہ ڳن۔ عالمی کاربن فوٹ پرنٹ اچ ہک فیصد توں وی ڳھٹ حصہ ہووݨ دے باوجود پاکستان انسانی ساختہ وݙی تباہی دا سامݨا کیتے۔ وزیر اعظم فنانسنگ اتے ٹائم لائنزݙوہیں لحاظ نال موافقت دے عالمی ہدف کوں ترجیح ݙیوݨ تے زور ݙتا۔ وزیراعظم آکھیا جو اساں کئی سالیں توں ڳالھیں کریندے پیوں پر بنیادی چیزاں تے متفق تھیوݨ اچ وی ناکام رہیے۔ 2009 اچ کوپن ہیگن کاپ-15 اچ 2020 تئیں سالانہ 100 بلین ڈالر جمع کرݨ دے وعدے اجاں تئیں پورے نی تھیے۔ سنگین موسمیاتی واقعات دی ودھدی ہوئی تعداد اتے شدت پاروں انہاں کوں ودھاوݨ دی لوڑھ اے۔ کاپ-27 اچوں 6 توں 20 نومبرتئیں اعلی سطحی اتے ضمنی تقریبات، اہم مذاکرات، اتےپریس کانفرنسز کیتی ڳی۔ کانفرنس اچ سو توں ودھ سربراہان مملکت تے حکومت اتے 35,000 توں ودھ شرکاء شریک تھیے اتے ایں وچال کئی پویلینز دا انعقاد وی کیتا ڳیا جئیں اچ پوری دنیا اچ اتے مختلف شعبیاں اچ موسمیاتی کاروائیاں دی نمائش کیتی ڳی۔
