اسلام آباد۔5مئی (اے پی پی):وفاقی حکومت معاشرے دے سارے طبقات بالخصوص محروم طبقیں توں تعلق رکھݨ آلے ٻالاں کوں تعلیم دے بہتر مواقع ݙیوݨ تے اے سہولت انہاں دی دہلیز تے پڄاوݨ کیتے آپݨے پہلے سال اچ تعلیمی شعبے اچ ٹیکنالوجی تے جدت دے حامل منصوبے متعارف کراوݨ کیتے اہم اقدامات چاتن ۔وزیر اعظم شہباز شریف اوکھے معاشی حالات اچ تعلیمی لاڳت اچ ودھارے دے پیش نظر ایں سال دے شروع وچ ݙو جدید منصوبیں ’’سکولز آن وِیلز‘‘ اتے ’’پاکستان ٹیلی سکول ایپ‘‘ دی قیادت کیتی۔انہاں فروری اچ پہلے مرحلے اچ 8 بساں تے مشتمل موبائل سکولاں دا منصوبہ شروع کیتا جیڑھا اسلام آباد اتے ملحقہ علاقیں دے ٻالاں کوں پرائمری سطح دی تعلیم ݙیندے پئن ، دارالحکومت دے مختلف جہیں تے کھڑیاں اے بساں کمپیوٹر، ڈیسک، وائٹ بورڈز اتے ایل سی ڈیز نال لآراستہ ہن جیڑھے جو اساتذہ تے طلباء کوں مشغول کرݨ تے سکھݨ دا ماحول ݙیندن ۔ وزیراعظم افتتاحی تقریب اچ ٻالاں کوں قوم دے مستقبل دے معمار قرار ݙیندے ہوئیں ایں ڳالھ دا اعادہ کیتا جو حکومت نینگر نلس کوں ودھ توں ودھ تعلیمی سہولتاں ݙیوݨ کیتے مسلسل کوشاں اے ۔ حکومت دی طرفوں موبائل سکول منصوبہ خاص طور تے دیہاتی علاقیں اچ شرح خواندگی ودھاوݨ کیتے سخت تے مسلسل کوششاں دا حصہ اے اڳلے مرحلے اچ بساں دی تعداد کوں ودھاوݨ تے ایں منصوبے کوں آزاد کشمیر سودھے ملک دیاں ٻیاں جہیں تے ودھاوݨ دا منصوبہ اے ۔ ایں منصوبے توں نظر انداز کیتے ڳئے تے محروم کمیونٹیز دے ٻالاں کوں پڑھے لکھیے اتے مزید تعلیم تے تکنیکی مہارت حاصل کرݨ دے قابل بݨاوݨ اچ مدد ملسی ۔ یونیسیف موجب پاکستان اچ 5توں 16 سال دی عمر دے تقریبا 22.8 ملین ٻال سکول نی ویندے پئے جیڑھے ایں عمر دے گروپ دی کل آبادی دا 44 فیصد ہن تے انفارمیشن ٹیکنالوجی دے نویں مہارتاں دے ذریعے انہاں تئیں تعلیم کوں قابل رسائی بݨاوݨ دی ٻہوں لوڑھ اے ۔ وزیر اعظم شہباز شریف ٻالاں دے گھراں تئیں تعلیم پڄاوݨ کیتے مارچ اچ وفاقی وزارتِ تعلیم دی طرفوں تیار کیتے ڳئے پاکستان ٹیلی سکول ایپ دا آغاز کیتے تے ایں دے حوصلہ افزا نتائج برآمد تھئن۔ صرف ھک ہفتے اچ ایپلی کیشن کوں 10,000 واری ڈاؤن لوڈ کیتا ڳے، 5500 دا اندراج کیتا ڳئے تے 310 شہراں اچ 17000 ویڈیوز ݙٹھیاں ڳئن۔ ایں منصوبے دا مقصد جماعت اول توں 12 ویں تئیں دے طلبا کو آن لائن تعلیم ݙیوݨا اے ۔ ٻالاں کوں تعلیم ݙیوݨ دا ھک ٻیا قدم چیندے ہوہئیں حکومت 30 جون تئیں اسلام آباد دارالحکومت دے علاقے اچ سکول توں ٻاہر 70,000 ٻالاں کوں سکولاں اچ گھن آوݨ دا کم کریندی پئی اے ۔ یاد رہے جو شہباز شریف بطور وزیر اعلیٰ پنجاب اپݨے دور اچ اعلیٰ تعلیم حاصل کرݨ آلے طلباء اچ لیپ ٹاپ تقسیم کرݨ دی سکیم کوں کامیابی نال عملی جامہ پوایا تے ھک واری ول وزیر اعظم تعلیمی اداریں اچ نمایاں کامیابی گھنݨ آلے طالب علماں اچ 100,000 لیپ ٹاپ تقسیم کرݨ دا منصوبہ بݨائے ۔وفاقی حکومت دے انہاں اہم اقدامات توں بالخصوص معاشرے دے کمزور طبقے تئیں تعلیم دی سوکھیں تے بہتر رسائی کوں یقینی بݨایا ویندا پئے۔
