اسلام آباد۔6مئی (اے پی پی) پاکستان اتے چین دا دوستانہ تعلقات کوں ٻیا ودھاوݨ اتے علاقائی امن تے سلامتی سودھے سی پیک دی ترقی کیتے رَل تے کم کرݨ دے عزم دا اعادہ کیتے۔ چھݨ چھݨ کوں دفترخارجہاچ پاکستانا تے چین دے وزراءخارجہ دے چوتھے سٹریٹجک ڈائیلاگ دے بعد سانجھی پریس کانفرنس تون خطاب کریندیں ہوئیں وزیر خارجہ بلاول بھٹو زرداری اتے انہاں دے چینی ہم منصب چن گانگ آکھیا جو پاکستان اتے چین معاشی ترقی اتے خوشحالی دے نال نال خطے خصوصی طور افغانستان اچ استحکام کیتے رل تے کوشش کریسن۔ چین پاکستان کوں اقتصادی چیلنجز نال نبڑݨ کیتے تعاون کریسی۔ ݙوہیں ملک ݙوپاسہ تعاون ٻیا ودھیسن۔ ایں توں پہلے وزیر خارجہ بلاول بھٹو زرداری اتے عوامی جمہوریہ چین دے سٹیٹ کونسلر اتے وزیر خارجہ کین گانگ وچال مذاکرات تھیے۔ وزیرخارجہ آکھیا جو پاکستان اتے چین وچال تزویراتی شراکت داری ٻہوں اہم اے۔ سی پیک پاکستان اتے چین وچال اہم منصوبہ اے، سی پیک علاقائی تجارت اتے رابطے ودھاوݨ دے علاوہ ݙوپاسہ تجارت دے ودھارے اچ اہم کردار ادا کریندا پے۔ بلاول بھٹو زرداری آکھیا جو مذاکرات وچال چینی ہم منصب نال اہم معاملیاں تے تفصیلی ڳالھ مہاڑ تھئی اے۔ انہاں چین دے وزیر خارجہ دا پاکستان آوݨ تے خیر مقدم کریندیں ہوئیں آکھیا جو خطے دی ترقی کیتے افغانستان اچ امن تے استحکام ضروری اے۔ وزیرخارجہ آکھیا جو اساں پرامن، مستحکم، خوشحال اتے متحدہ افغانستان کیتے سارے متعلقہ فریقاں نال رَل تے کم کریندے رہسوں۔ انہاں جموں تے کشمیر دے مسئلے سودھے سارے مسئلیاں دے حل کیتے چین دی مسلسل حمایت اتے تعاون دی تعریف کیتی۔ اساں موسمیاتی تبدیلیاں سویں عالمی خطرے پاروں چین نال رل تے کم کریندے رہسوں۔ سانجھی پریس کانفرنس توں خطاب کریندیں ہوئیں چین دے وزیر خارجہ آکھیا جو انہاں دا پاکستان دا اے پہلا دورہ اے، پاکستان آوݨ دے بعد انہاں دی صدرمملکت ڈاکٹر عارف علوی نال ملاقات تھئی اتے انہاں کوں چین دے صدر دا خیر سگالی دا سنیھا پڄائے۔ ڳالھ مہاڑ اچ چین پاکستان تعلقات تے تفصیلی ڳالھ مہاڑ تھئی اے۔ عوامی جمہوریہ چین دے سٹیٹ کونسلر اتے وزیر خارجہ آکھیا جو چین اتے پاکستان پراݨے دوست ہن، ݙوہیں ملکاں وچال آپسی تعلقات اتے دوستی قیمتی اثاثہ اے۔ کین گانگ آکھیا جو چین پاکستان دی خودمختاری اتے قومی وقار سودھے ہر قسم دی حمایت کریندا رہسی۔ چین دی حمایت تے پاکستان دا کردار قابل تعریف اے۔ ایں موقع تے چین دے نائب وزیر خارجہ، وزیر مملکت برائے امور خارجہ حنا ربانی کھر، سیکرٹری خارجہ ڈاکٹر اسد مجید خان اتے دفتر خارجہ دے ٻے حکام موجود ہن۔
