اسلام آباد۔23مئی (اے پی پی سرائیکی نیوز سروس) شہید بھٹو فاؤنڈیشن ولوں ثقافتی رنگا رنگی دا جڳ ݙیھاڑ منایا ڳیا ۔ ایں حوالے نال ہک تقریب دا اہتمام کیتا ڳیا جئیں دے اچ وݙی تعداد اچ لوک شریک تھیے۔ ایں موقع تےشہید بھٹو فاؤنڈیشن دے سی ای او آصف خان ڳالھ مہاڑ کریندیں ہک سوال چاتا جو پاکستان اچ ایں ویلھے صوبیاں دی تحریک دی ڳالھ چلدی پی اے اتے سرائیکی صوبے دی ڳالھ وی چلدی پی اے کیا لسانی بنیاد تے صوبیاں دی ونڈ تھیوݨ ٹھیک اے،اے سوال انہاں تقریب دے سپیکر اڳوں رکھیا اتے سپیکرز اچوں دانشور ڈاکٹر ارشد وحید ایندی تائید کیتی اتے آکھای جو وسائل دی ونڈ منصفانہ نی کیتی ویندی پی تاں میں اے سمجھداں جو سرائیکی صوبہ ہووݨا چاہیدے اتے میں ایندے حق اچ آں، ڈاکٹر ناظر محمود آکھیا جو سرائیکی صوبہ ہووے تاں ولا اردو،ہزارہ باقی صوبے وی انتظامی بنیاداں تے ہووݨے چاہیدن۔ ایں تقریب اچ بیرسٹرسید مسعود کوثر وی موجود ہن انہاں دا وی آکھݨ ہئی جو اساکوں ہر ہک کوں حقوق ݙیوݨے پوسن اتے بعد اچ ٻی ڳالھ کرݨی پوسی۔ ایں تقریب اچ سینئر اگواݨ پاکستان پیپلز پارٹی فرحت اللہ بابر ڳالھ مہاڑ کریندیں ہوئیں آکھیا جوسرائیکی صوبے بارے ہک پارلیمانی کمیشن ٻݨایا ڳیا ہئی جئیں دا میں چیئرمین ہم اوندے اچ اے فیصلہ کیتا ڳیا ہئی جواساں سرائیکیاں کوں صوبہ ݙیسوں ، جئیں تے اساں کم کریندے پے ہاسے پر او کم کجھ وجوہات پاروں رک ڳیا ہئی ، امید اے جو ایں تے عمل کیتا ویسی۔
