اسلام آباد۔31مئی (اے پی پی سرائیکی سروس) بےنظیر کیڈٹ کالج خانپور دے خلاف تھیوݨ آلی سازش کوں کامیاب کائنا تھیوݨ ݙیسوں اتے اینکوں فنگشنل کراوݨ اچ آوݨ آلی رکاوٹاں دا مقابلہ کریسوں۔ اے ڳالھیں چولستان بچاؤ تحریک دے سربراه اتے پیپلزکلچرل ونگ سرائیکی وسیب دے صوبائی سیکرٹری اطلاعات راشد عزیزبھٹہ سرائیکی سروس نال ڳالھ مہاڑ کریندیں ہوئیں آکھی۔ انہاں آکھیا جو وسیب دے ٻالاں دے کوں ایں حق توں محروم رکھݨ کیتے گنتری دے کجھ لوک بےنظیر کیڈٹ کالج خانپور کوں فنگشنل کرواوݨ اچ رکاوٹاں پیندے پن اتے ایں کالج کوں ہمیش واسطے ختم کرݨ کیتے وزیراعظم شہباز شریف ۔ گورنر پنجاب اتے وائس چانسلر اسلامیہ یونیورسٹی بہاولپور کوں قائل کرݨ دی کوشش کیتی ڳی اے جو وسیب کوں کیڈٹ کالج دی لوڑھ کائنی اتے 250 ایکڑ زمین تے ہک ارب روپے دی لاگت نال ٻݨݨ آلے بےنظیر بھٹو کیڈٹ کالج خانپور کوں ختم کرݨ کیتے گائیڈ کیتا ڳے اتے تجویز ݙتی ڳی اے جو ایندی ڄاہ تے اسلامیہ یونیورسٹی بہاولپور دا کیمپس ٻݨا ݙتا ونڄے ایں نال وسیب کوں فائدہ تھیسی۔ راشد عزیزبھٹہ سخت ردعمل ݙیندیں ہوئیں آکھیا جو پسماندہ وسیب دے ٻال کیڈٹ کالج اچ پڑھ تے آرمی افسر ٻݨسن اتے ملک دی ترقی اچ اہم کردار ادا کریسن۔کجھ سازشی لوک گھناؤنی سازش نال ایندے خلاف سازش کریندے پن۔ انہاں آکھیا جو وسیب دا کلھا کیڈٹ کالج خانپور سابق وزیراعظم سید یوسف رضا گیلانی دی منظوری اتے فنڈز نال ٻݨیے، کالج بݨ ڳے فرنیچر وی آڳے صرف کلاساں شروع تھیوݨ۔ اساݙا مطالبہ اے جو ای ڄاہ کیڈٹ کالج کیتے منظورتھی اے اتے فنڈز وی کیڈٹ کالج کوں ݙتے ڳن اتے ایں ڄاہ تے کلاساں شروع کرائی ونڄن اتے ایندے خلاف سازش نہ کیتی ونڄے۔ انشاءاللہ وسیب دے ٻال کیڈٹ کالج اچ پڑھ تے ملک دی خدمت کریسن۔
