لاہور۔4جون(اے پی پی)وفاقی وزیرہوا بازی و ریلوے خواجہ سعد رفیق آکھیے جو امریکہ اچ پی آئی اے دی ملکیت روزویلٹ ہوٹل پٹے تے ݙے ݙتے، 220 ملین ڈالر 3 سال اچ پاکستان آسن، ملک دے 3 ایئر پورٹس آئوٹ سورس کیتن، سول ایوی ایشن دا کوئی ملازم بیروزگار نہ کیتا ویسی، ملائیشیا اچ پی آئی اے دا جہاز 72گھنٹے اچ چھڑوا ڳھدے۔ اے ڳالھ انہاں الہور اچ علامہ اقبال انٹرنیشنل ایئر پورٹ تے پریس کانفرنس کریندے آکھی۔ انہاں نال سیکرٹری ایوی ایشن کیپٹن سیف انجم، ایم ڈی پی آئی اے انویسٹمنٹ، سی ای او ائیرپورٹ نبیل احمد وی موجود ہن۔ وفاقی وزیر آکھیے جو روزویلٹ ہوٹل سٹی ایڈمنسٹریشن نیویارک کوں 3 سال کیتے پٹے تے ݙتے جیندے نال پاکستان کوں 220 ملین ڈالر ملسن، ہوٹل دی 19منزلہ عمارت نال 40منزلہ ٹاور وی ٻݨایا ویسی۔
