اسلام آباد ۔6 جون ( اے پی پی سرائیکی نیوز ) وفاقی وزیر تخفیف غربت وسماجی تحفظ / چیئرپرسن بینظیر انکم سپورٹ پروگرام شازیہ مری اے پی پی کوں خصوصی انٹرویو ݙیندے ہوئیں آکھیے اے پروگرام 2008 اچ شروع تھیا۔ بے نظیر انکم سپورٹ پروگرام کوں 15 سال تھی ڳئن ، انہاں آکھیے جو اے پروگرام ساریاں سیاسی جماعتاں دے اتفاق نال بݨیا جیڑھا جو سیاسی وابستگی توں بالاتر اے ۔ ایہا وجہ اے جو 15 سال اچ حکومتاں بدلݨ دے باوجود اے پروگرام تبدیل نی تھی سڳیا ، انہاں آکھیے سابق صدر آصف علی زرداری محترمہ بے نظیر بھٹو دے وژن کوں سامݨے رکھیندے ہوئیں اے پروگرام ترتیب ݙتا ایں پروگرام اچ ھک غریب خاندان دی تریمت کوں اوندے ٹبر دے سربراہ دے طور تے ڳھدا ڳئے ، ایں پروگرام سبب تریمتاں کوں انہاں دے گھراں اچ اہمیت ملی۔ایں پروگرام اچ جدید ٹیکنالوجی دا استعمال عمل اچ گھن آیا ڳیا تے ہݨ ایں پروگرام اچ بائیو میٹرک دا استعمال کیتا ویندا پئے ، ایں ماڈل اچ وی تریمتاں کوں اوکھ دا سامݨا اے اساں اینکوں وی بدلݨ چاہندوں ۔ وفاقی وزیر آکھیے ہݨ اساں چاہندے پیوں جو تریمتاں دے بینک اکائونٹس کھلوائے ونڄن ، انہاں کوں مالیاتی طور تےخود مختار بݨایا ونڄے، تے ایں پروگرام توں تریمتاں گھراں توں ٻاہر نکلن تے انہاں کوں مضبوط کرݨ اچ مدد ملے۔ انہاں آکھیےجو بےنظیر انکم سپورٹ پروگرام اچ تریمتاں دے شناختی کارڈ نمبر دے ذریعے پیمنٹس کیتی ویندی اے پرے دے علاقیں اچ تریمتاں دے شناختی کارڈ نہ بݨوائے ویندے ہن ، انہاں آکھیےشناختی کارڈ بنیادی سنڄاݨ ہوندے ، تساں ووٹ پیندو ، اکائونٹ کھلویندو، انہاں آکھیے بے نظیر انکم سپورٹ پروگرام توں لوکاں شناختی کارڈ بݨواوݨ شروع کرݙتن بے نظیر انکم سپورٹ پروگرام عورتاں کوں مضبوط کرنڑ دا بہترین وسیلہ اے ، ایں توں تریمتاں اچ شعور پیدا تھئے ، ایں پروگرام اچ حاملہ ماواں دی تعداد وی پتہ لگے ، ماواں دی غذائی ضروریات ، حفاظتی ٹیکے ، ٻال دی بہتر نگہداشت تے صحت کوں ایں پروگرام اچ ترجیح ݙتی ڳئی بے نظیر انکم سپورٹ پروگرام اچ ھک سال اچ 6 ملین ٻالاں کوں شامل کیتا ڳئے۔ ایں پروگرام اچ تعلیم دی مد اچ غریب خانداناں کوں مالی امداد ݙتی ڳئی تاں جو انہاں دے ٻال بہتر تعلیم حاصل کرسڳن۔ تعلیمی وظائف دا پروگرام طلبا و طالبات ݙوہیں کیتے اے ، طلبا سانگے 1500 روپے جݙاں جو طالبات کوں 2000 روپے ݙتے ویندن ۔ ایں پروگرام توں آئوٹ آف سکول چلڈرن دی تعداد اچ گھٹکی تھئی تے داخلیں دی شرح ودھ ڳئی ۔
