اسلام آباد۔21جون (اے پی پی سرائیکی نیوز سروس)پاکستان پیپلز پارٹی دے سیکرٹری جنرل فرحت اللہ بابر آکھیا جو سابق وزیراعظم محترمہ بے نظیر بھٹو جمہوریت دی بالادستی کیتے جدوجہد دی عظیم مثال ہن۔اے ڳالھ انہاں اسلام آباد اچ ” شہید بے نظیر فاؤنڈیشن ولوں” محترمہ بے نظیر بھٹو دی 70 ویں سالگنڈھ سانڳے ” وہ آج بھی زندہ ہے” دی تقریب توں خطاب کریندیں ہوئیں آکھی۔ تقریب اچ سابق وزیراعظم محترمہ بے نظیر بھٹو دی صاحبزادی آصفہ بھٹو ، وفاقی وزیر سینیٹر شیری رحمان ، چیئرپرسن بے نظیر انکم سپورٹ پروگرام شازیہ مری اتے نفیسہ شاہ سودھے ٻے شرکاء وی موجود ہن۔ ایں موقع تے وزیراعظم محترمہ بے نظیر بھٹو دی صاحبزادی آصفہ بھٹو سالگنڈھ دا کیک کٹیا۔ ایں موقع تے فرحت اللہ بابر محترمہ بے نظیر بھٹو دی جمہوریت کیتے خدمات اتے تاریخی جدوجہد کوں خراج تحسین پیش کریندیں ہوئیں آکھیا جو بے نظیر اساں اچ موجود کائنی پر انہاں دی سیاسی جدوجہد اڄ وی اساݙے دل تے دماغ اچ زندہ اے اتے رہسی۔
