اسلام آباد۔21جون (اے پی پی سرائیکی نیوز سروس) چیئرپرسن بے نظیر انکم سپورٹ پروگرام شازیہ مری آکھیا جو بے نظیر انکم سپورٹ پروگرام غریباں دی خدمت سانڳے شہید محترمہ بے نظیر بھٹو دے وژن دا پروگرام اے جینکوں پورا جڳ منیندے۔ ملک اچ جمہوریت سماجی ترقی اتے محروم طبقیاں کوں اڳوں تے کرݨ کیتے اپݨی قائد دی سوچ دے مطابق کم کرݨ اچ کوئی کسر نہ چھڑیسوں۔ اے ڳالھیں انہاں اسلام آباد اچ ” شہید بے نظیر فاؤنڈیشن ولوں” محترمہ بے نظیر بھٹو دی 70 ویں سالگنڈھ سانڳے ” وہ آج بھی زندہ ہے” دی تقریب توں خطاب کریندیں ہوئیں آکھی۔ تقریب اچ سابق وزیراعظم محترمہ بے نظیر بھٹو دی صاحبزادی آصفہ بھٹو ،سینئر رہنما فرحت اللہ بابر ، وفاقی وزیر سینیٹر شیری رحمان، اتے نفیسہ شاہ سودھے ٻے شرکاء وی موجود ہن۔ ایں موقع تے وزیراعظم محترمہ بے نظیر بھٹو دی صاحبزادی آصفہ بھٹو سالگنڈھ دا کیک کٹیا۔
