ڈیرہ غازی خان ۔ 14 جولائی (اے پی پی):چیئرمین مرکزی رویت ہلال کمیٹی اتے خطیب بادشاہی مسجد مولانا سید محمد عبدالخبیر آزاد آکھیے ملک کوں پیش آندے چیلنجز نال نبݨݨ کیتے اتحاد بین المسلمین دے”پیغام پاکستان“دا ودھارا ویلھے دی لوڑھ اے ،قیامِ امن کیتے علما کوں حکومت نال بھرپور تعاون کرݨا ہوسی ،افواج پاکستان تے ٻئے سکیورٹی اداریں بے مثال قربانیاں ݙے تے ملکی دفاع کوں تکڑا کیتے ، اے ڳالھ انہاں صوبائی اتحاد بین المسلمین دے وفد دے رلے ڈیرہ غازی خان دا دورہ کرݨ ویلھے امن کانفرنس توں خطاب کریندے ہوئیں آکھی اے ، ایں موقع تے کمشنر ڈاکٹر ناصر محمود بشیر، ڈپٹی کمشنرز مہر شاہد زمان لک ،محمد سلمان لودھی ،خالد پرویز،ڈی پی او حسن افضل،ڈویژنل امن کمیٹی دے ارکان تے سارے مکاتب فکر دے علما موجود ہن ۔ کانفرنس توں خطاب اچ سید عبدالخبیر آزاد آکھیے حکومت پنجاب دی ہدایت تے صوبائی اتحاد بین المسلمین دا وفد ڈیرہ غازی خان دا دورہ کریندا پئے ساݙا مقصد محرم الحرام اچ امن و امان اتے ہم آہنگی کوں ودھاوݨا اے ، انہاں آکھیے قرآن پاک دی تعلیمات اتے حضور پاک صلی اللہ علیہ وآلہ وسلم دی سیرت اساں کیتے مشعل راہ اے ۔انہاں آکھیے محرم الحرام اچ علمائے کرام اپݨی صفاں اچ اتحاد پیدا کرن،اشتعال انگیز تقریر اتے کہیں دا دل نہ ݙکھایا ونڄے ،پیغام پاکستان امن دی علامت اے،اساں رل مل تے دشمن دے عزائم ناکام بݨیسوں ، سید محمد عبدالخبیر آزاد آکھیے حکومت پنجاب دی خصوصی ہدایت تے محرم الحرام اچ امن سانڳے پورے صوبے دا دورہ کریندے پیوں تے وطن نال محبت ساݙے ایمان دا حصہ اے تے محرم الحرام دے مقدس مہینے اچ سیدنا فاروق اعظمؓ و سیدنا امام حسینؓ دی شہادت توں اساکوں صبر و قربانی اتے اخوت دا درس ملدے ،ساݙی مشترکہ کوششاں پاروں محرم امن و خیریت نال گزرسی ۔سارے علما امن و محبت دا درس ݙیون،تخریب کاراں تے کڑی نگاہ رکھی ویسی تے محراب و منبر توں کہیں وی فرقے دا دل نہ ݙکھایا ویسی ۔
