اسلام آباد۔14جولائی (اے پی پی سرائیکی سروس) تریمتیں کوں جیڑھا مقام تے احترام اسلام ݙتے او دنیا دے کہیں مذہب اچ کائنی۔ اے ڳالھیں سماجی تنظیم نیلاب چلڈرن اینڈ وومن ڈویلپمنٹ کونسل اتے محکمہ سوشل ویلفئیر یو سی ڈی پی جام پو ر ولوں کمشنر دیرہ غازیخان اتے ڈپٹی کمشنر راجن پور دی ہدایت تے تھیوݨ آلے سیمینار اچ مقررین ڈپٹی ڈائریکٹر سوشل ویلفیئر ، شازیہ نواز ‘ سوشل ویلفئیر آفیسر یو سی ڈی پی تہمینہ امیر گورمانی ‘ فرح رضا تحصیل پاپولیشن آفیسر فرحین سیف قاضی ‘ کرن یوسف ‘ مسز شائستہ قاضی ‘ ممبر امن کمیٹی قاری عابد حسین سلطانی ماہرین تعلیم محمد افضل شاہین ‘ ملک ریاض حیدر ‘ ڈاکٹر امجد اسلام پتافی ‘ صدر نیلاب آفتاب نواز مستوئی ووکیشنل ٹریننگ انسٹی ٹیوٹ دی طالبات اتے ٻئے مقررین کیتی ۔ انہاں آکھیا جو تریمت وی انسان اے اتے اونکوں وی سکون دی حیاتی جیوݨ دا پورا حق اے ، ہر ݙینھ تریمتیں تے ودھدے ہوئے تشدد دے واقعے تشویش دی ڳالھ ان انہاں کوں روکݨ اساں ساریاں دی ذمہ واری اے۔ سیمینار اچ مختلف محکمے تے سماجی تنظیماں دے نمائندے، وکیل ،سوشل ورکر ، صحافی اتے تریمتیں دی وݙی تعداد شریک تھئی اتے ایں موقع تے نیلاب ولوں طالبات کوں تعریفی سنداں وی ݙتیاں ڳیاں ۔
