مظفرگڑھ۔ 18 جولائی (اے پی پی) وزیر اعلیٰ پنجاب اتے ایڈیشنل آئی جی جنوبی پنجاب مظفرگڑھ اچ ترائے سکی ٻھیݨیں دے اغواء دے بعد قتل دا نوٹس ڳھن ڳھدے۔ پولیس دے ترجمان موجب تھاݨاں سٹی مظفرگڑھ دی حدود اچ دل دہلا ݙیوݨ آلا واقعہ تھیے، تھرمل اسٹیشن دی رہائش کالونی اچ ترائے سکی ٻھیݨیں دا اغواء دے عبد قتل دے واقعے تے وزیر اعلیٰ پنجاب اتے ایڈیشنل آئی جی جنوبی پنجاب دی ہدایت تے ڈی پی او مظفرگڑھ سید حسنین حیدر موقع تے پڄ ڳے۔ انہاں مقتوض ٻالڑیاں دے وارثاں نال ملاقات کیتی اتے ملزماں کوں کیفر کردار تئیں پڄاوݨ دا یقین ݙوایا۔ پولیس ترجمان موجب تھرمل پاور اسٹیشن دی رہائشی کالونی اچ تھرمل کالونی دے سیکیورٹی سارجنٹ اعجاز دی 7 سال دی دھی فاطمہ اتے 8 سال دی دھی زہرا گزریل رات ویلھے کھیݙݨ کیتے گھروں ٻاہر نکلی انہاں دے واپس نہ آوݨ تے انہاں دی تریجھی ٻھیݨ 11 سالہ عریشہ انہاں کوں ڳولݨ کیتے نکلی۔ ترائیں ٻالڑیاں دے واپس نہ آوݨ تے پولیس تھاݨاں سٹی اتے علاقے دے لوک دیر رات تئیں ڳولیندے رہیے۔ سرچ آپریشن اچ گھر نال ہک خالی کوارٹر اچ ترائیں ٻالڑیاں دی گچی کپی لاشاں ملی۔ ڈی پی او مظفرگڑھ سید حسنین رضا اطلاع ملݨ تے فوری موقع تے پڄ ڳے۔ انہاں مقتول ٻالڑیاں دے والدین نال ملاقات کر تے تعزیت کیتی اتے انہاں ملزماں کوں جلدی گرفتار کر تے سزا ݙواوݨ دا یقین ݙوایا۔ ایں موقع تے ڈی پی او آکھیا جو او وزیر اعلی پنجاب دی ہدایت تے عمل کریندے پن۔ انہاں پولیس کوں جدید ٹیکنالوجی دا استعمال کر تے ملزماں کوں جلدی پکڑݨ دا حکم ݙتے۔ پولیس کرائم سین یونٹ اتے پولیس فرانزک ٹیماں موقع تے اہم ثبوت کٹھے کر ڳھدن۔ ریسکیو 1122 پولیس دی نگرانی اچ ترائیں ٻالڑیاں دی لاشاں کوں پوسٹمارٹم کیتے ڈسٹرکٹ ہیڈکوارٹر ہسپتال پڄا ݙتے۔
