نیویارک۔20جولائی(اے پی پی):نیویارک اچ اقوام متحدہ دے ہیڈ کورارٹرز اچ عالمی امن مشنز دے تحت دنیا دے مختلف حصیں اچ فرائض نبھاوݨ ویلھے 2022 اچ جاناں دا نذرانہ پیش کرݨ آلے امن مشنز دے7 پاکستانیاں سودھے 77 ارکان کوں خراج عقیدت پیش کیتا ڳئے ایں سلسلے اچ گزریل ݙینھ اقوام متحدہ دے ہیڈکوارٹرز اچ ٹرسٹی شپ کونسل چیمبر اچ منعقدہ تقریب اچ رکن ملکاں جاناں دے نذرانے پیش کرݨ آلے 77 ارکان کوں خراج عقیدت پیش کرݨ کیتے کٹھے تھئن جنہاں اچ 7 پاکستانی وی شامل ہن، جنہاں 2022 اچ اقوام متحدہ دے امن مشنز اچ خدمات انجام ݙیندے ہوئیں آپݨیاں جاناں ونڄائیاں ۔ تقریب اچ جاں بحق اہلکاراں دے لواحقین، سفارتی برادری دے ارکان اتے پوری دنیا توں اقوام متحدہ دے عملے ذاتی طور تے اتے آن لائن شرکت کیتی۔ تقریب اچ جمہوریہ کانگو اچ ہیلی کاپٹر حادثے اچ پاکستانی امن مشن دے شہید میجر فیضان علی دی ذال ڈاکٹر مریم عامر وی شرکت کیتی۔اقوام متحدہ اچ پاکستان دے سفیر منیر اکرم اتے نیویارک اچ پاکستانی مشن دے ملٹری ایڈوائزر کرنل عمر شفیق چغتائی وی موجود ہن ۔اقوام متحدہ دے سیکرٹری جنرل انتونیو گوتریش تقریب توں خطاب کریندے ہوئیں آکھیے اساں اتھاں آپݨے محسناں کوں خراج عقیدت پیش کرݨ ، انہاں کوں یاد کرݨ تے انہاں دی ترکیم کیتے کٹھے تھیوں ۔
