اسلام آباد۔24جولائی (اے پی پی سرائیکی نیوز سروس)سرائیکی ادبی اکیڈمی ولوں سنوار کوں سرائیکی دے عظیم مرثیہ گو شاعر مولوی محمد رمضان بہار ملتانی دے 57 ویں ورھیݨیں تے محفل مسالمہ نیشنل پریس کلب اسلام آباد اچ تھئی اے جئیں دی صدارت انہاں دے پتر ممتاز اسکالر ڈاکٹر غضنفر مہدی کیتی ۔ مسالمہ دے مزمان خصوصی معروف شاعر وفا چشتی اتے سابق ڈائریکٹر نیوز پی ٹی وی نذیر تبسم ہن۔مزمان اعزاز قاضی ظہیر احمد ہن۔ ایں موقع تے شعراء کرام سید الشہدا دی بارگاہ اچ سلام پیش کیتا۔ ایں موقع تے ڈاکٹر غضنفر مہدی ڳالھ مہاڑ کریندیں ہوئیں آکھیا جو بہار ملتانی ہمیشہ امام حسین دے فلسفے تے ٹرݨ دا درس ݙتا اتے اڄوکے دور اچ سیاسی سماجی اتھل وتھل کوں روکݨ سانڳے اساکوں امام حسین دے ݙتے سبق تے ٹرݨ دی لوڑھ اے۔ محفل مسالمہ اچ ملتان توں آئے سرائیکی ڈیموکریٹک پارٹی دے اڳواݨ خواجہ شعیب ، شاعراں اچ طاہر بلوچ، اتے ٻے شاعر شریک تھیے۔ تقریب دے میزبان سرائیکی ادبی اکیڈمی دی صدر ڈاکٹر سعدیہ کمال آکھیا جو حسین ہک سوچ، فکر، فلسفے دا ناں اے جئیں جبر، ظلم اتے کوڑ دے خلاف جنگ لڑی۔ اڄوکے دور اچ عدم برداشت ودھدی ویندی اے ایندے سانڳے اساںکوں فلسفہ حسین دی لوڑھ اے اتے عظیم مرثیہ گو شاعر بہار ملتانی سرائیکی زبان اچ مرثیہ اینویں لکھیا ہئی جو محسوس تھیندا ہئی جینویں لوک کربلا اچ موجود ہوون۔
