اسلام آباد۔25جولائی (اے پی پی سرائیکی نیوز سروس) ممتاز سکالر ڈاکٹر غضنفر مہدی چیئرمین ورلڈ سرائیکی کانگرس آکھیا جو فن مرثیہ گوئی پاروں سرائیکی زبان کوں عالمی سطح تے وکھری سنڄاݨ ملی اے۔ سرائیکی زبان تے ادب دی ترقی کیتے جامع حکمت عملی دی لوڑھ اے۔ اے ڳالھیں انہاں عظیم مرثیہ گو شاعر بہار ملتانی دے 57ویں ورھیݨے دے موقع تے سرائیکی ادبی اکیڈمی ولوں نیشنل پریس کلب اسلام آباد اچ انہاں دے ایصال ثواب کیتے تھیوݨ آلی محفل مسالمہ اچ صدارتی خطاب کریندیں ہوئیں آکھی۔ انہاں آکھیا جو سرائیکی ایشیا دی مٹھی اتے من بھاوݨی زبان اے۔ انہاں آکھیا جو بہار ملتانی سرائیکی ادبی تحریک دے بانی ہن۔ سرائیکی خطے دے سارے لہجیاں کوں سرائیکی زبان دا درجہ ݙیوݨ کیتے پہلے پہلی مجلس عاملہ دا اجلاس انہاں دے گھر بہار منزل تے تھیا ہئی جئیں پاروں سرائیکی کنونشن بابل قریش اچ پیر علی محمد راشدی اتے حسام الدین صدارت کیتی۔ ایں کنونشن اچ فیصلہ کیتا ڳیا جو سرائیکی خطے دی ساری زباناں اتے لہجیاں کوں رلا تے ایندا ناں سرائیکی رکھیا ویسی۔ ایں موقع تے خواجہ شعیب الحسن آکھیا جو سرائیکی زبان تے ادب کوں گزریل پچھتر سالیں توں نظرانداز کیتا ڳے۔ نذیر تبسم آکھیا جو بہار ملتانی دی خدمات کوں ہمیشہ یاد رکھیا ویسی۔ قاضی ظہیر احمد آکھیا جو سرائیکی ساریاں توں مٹھی زبان اے۔ سرائیکی ادبی اکیڈمی دی صدر ڈاکٹر سعدیہ کمال حاضرین دا شکریہ ادا کریندیں ہوئیں آکھیا جو بہار ملتانی ایں دور دے ساریاں توں وݙے مرثیہ گو شاعر ہن۔ فن مرثیہ تے انہاں دی سولہاں توں ودھ کتاباں چھپین۔ محفل مسالمہ اچ نامور شعرا کرام وفا چشتی، قاضی ظہیر احمد ناصر منگل، نصرت یاب نصرت، سید رضوان حیدر رضوان ، جمال زیدی، جہانزیب صالح، طاہر فاروق بلوچ اتے ٻے شعراء کرام امام عالی مقام نواسہ رسول دے حضور اپݨا کلام پیش کیتا۔ ایں محفل دی نظامت شاہد دھریجہ کیتی۔ ایں موقع تےسرائیکی ڈیموکریٹک پارٹی دے اڳواݨ خواجہ شعیب الحسن مزماناں کوں سرائیکی اجرکاں پیش کیتیاں۔
