اسلام آباد۔26جولائی (اے پی پی) پاکستان کرکٹ ٹیم دے مایہ ناز مڈل آرڈر بلے باز سعود شکیل سری لنکا دے خلاف سیریز دے ݙوجھے اتے چھیکڑی ٹیسٹ میچ اچ نویں تاریخ رقم کر ݙتی، ست ٹیسٹ میچاں اچ ففٹی کرݨ آلے پہلے بلے باز ٻݨ ڳئے ۔ 27 سالہ سعود شکیل ٹیسٹ کرکٹ دی 146 سالہ تاریخ پلٹ ݙتی اے۔ بدھ کوں سری لنکا دے دارالحکومت کولمبو اچ کھیݙیے ڳئے سری لنکا دے خلاف ݙوجھے ٹیسٹ میچ دی پہلی اننگز اچ سعود شکیل 57 رنز ٻݨا تے اے کارنامہ سرانجام ݙتا۔ او پہلے ست ٹیسٹ میچاں اچ 50 یاں اوں توں ودھ رنز ٻݨاوݨ آلے پہلے بلے باز ٻݨ ڳئن۔ ایں توں پہلے اے اعزاز کوئی کھݙاری حاصل نی کر سڳیا۔ سعود شکیل نہ صرف 96.78 دی اوسط نال 871 رنز ٻݨائن بلکہ 146 سالہ ٹیسٹ کرکٹ دی تاریخ کوں وی الٹ ݙتے۔ سعود شکیل 7 ٹیسٹ میچاں اچ پاکستان ولوں کھیݙدیں ہوئیں 13 اننگز اچ 871 رنز ٻݨائن جئیں اچ انہاں دی چھی نصف سنچریاں اتے ݙو سنچریاں شامل ہن اتے انہاں دا کیریئر بیسٹ 208 رنز ہن۔
