سی پیک دی 10 ویں سالگرہ، چینی نائب وزیر اعظم آݙت کوں 3 ݙینھ دے دورے تے اسلام آباد پڄسن

اسلام آباد۔29جولائی(اے پی پی)حکومت پاکستان دی دعوت تے چین دے نائب وزیر اعظم اتے کمیونسٹ پارٹی دی سنٹرل کمیٹی دے پولٹ بیورو دے رکن “ہی لائفنگ” 30 جولائی آݙت توں یکم اگست تئیں 3 ݙینھ دے دورے تے پاکستان آندے پن جتھاں او اسلام آباد اچ سی پیک دی 10 ویں سالگرہ تقریبات اچ شرکت سودھا صدر پاکستان ڈاکٹر عارف علوی اتے وزیراعظم شہبازشریف نال وی ملسن۔ او چین پاکستان اقتصادی راہداری (سی پیک) دا ݙھاکا مناوݨ کیتے رکھی ڳئی تقریب اچ مہمان خصوصی ہوسن۔ نائب وزیر اعظم ہی لائفنگ چین دے بین الاقوامی اقتصادی تعلقات اتے بیلٹ اینڈ روڈ انیشی ایٹو سانڳے اہم کردار ادا کیتے۔ نیشنل ڈویلپمنٹ اینڈ ریفارم کمیشن دے چیئرمین ہوندے انہاں پاکستان اچ سی پیک دے مختلف منصوبیاں دی حکمت عملی اتے عملدرآمد کیتے وݙا کم کیتے۔ اے دورہ پاکستان اتے چین وچال باقاعدہ اعلیٰ سطح تبادلیاں اتے مذاکرات دا حصہ اے۔