حکومت عوامی فلاح و بہبود تے یقین رکھدی اے، رل تے ملک کوں عظیم ٻݨیسوں، وزیر اعظم شہباز شریف

لاہور۔30جولائی(اے پی پی)وزیر اعظم محمد شہباز شریف آکھیے جو حکومت عوامی فلاح و بہبود تے یقین رکھدی اے، رل تے ملک کوں عظیم ٻݨیسوں، عاشورہ دے پرامن رہݨ تے پنجاب سودھا سارے صوبائی حکومتاں اتے قانون نافذ کرݨ آلے اداریاں کوں خراج تحسین پیش کریندے ہیں۔ اے ڳالھ انہاں گورنر ہاؤس لاہور اچ چھی مختلف ترقیاتی منصوبیاں دا افتتاح اتے سنگ بنیاد رکھݨ دی تقریب نال خطاب اتے میڈیا نال الیندے آکھی۔ انہاں منصوبیاں اچ ایل این جی دا 1263 میگا واٹ دا پنجاب تھرمل پاور پلانٹ جھنگ، لاہور میڈیکل سٹی، نیشنل ہیلتھ سپورٹ پروگرام، پاپولیشن ویلفیئر پروگرام، ایس ایل۔تھری لاہور رنگ روڈ منصوبہ اتے شاہدرہ تا کالاشاہ کاکو میٹرو بس توسیعی پروگرام شامل ہین۔ تقریب اچ گورنر پنجاب بلیغ الرحمان، نگران وزیر اعلیٰ پنجاب محسن نقوی، وفاقی وزیر توانائی انجینئرخرم دستگیر، وزیر مملکت برائے پٹرولیم مصدق ملک، نگران وزیر صحت پنجاب ڈاکٹر جاوید اکرم، چیف سیکریٹری پنجاب زاہد اختر زمان، آئی جی پو لیس پنجاب عثمان انور اتے ٻئے اعلیٰ حکام وی موجود ہن۔ وزیر اعظم محمد شہباز شریف کوں مذکورہ ترقیاتی منصوبیاں بارے بریفنگ وی ݙتی ڳئی۔