پاک چین دوستی اچ کوئی رکاوٹ برداشت نہ کیتی ویسی، وزیراعظم شہباز شریف دا ݙوہیں ملکاں وچال مفاہمت دی 6 دستاویزات اتے یادداشتاں تے دستخطاں دی تقریب توں خطاب

اسلام آباد۔31جولائی  (اے پی پی) وزیراعظم محمد شہبازشریف آکھیا جو پاک چین دوستی  اچ کوئی رکاوٹ برداشت نہ کیتی ویسی۔چین اتے پاکستان صدابہار دوست ہن۔ پاکستان سانجھی ترقی اتے خوشحالی بارے صدر شی جن پنگ   دے نظریئے اتے تصورات نال کھڑے، سی پیک دے تحت پاکستان اچ بجلی، سڑکاں دے  انفراسٹرکچر، پن بجلی  اتے پبلک ٹرانسپورٹ سودھے مختلف شعبیاں اچ 25 ارب ڈالر توں ودھ دی سرمایہ کاری تھئی اے۔ سنوار کوں چین دے نائب وزیراعظم ہی  لی فینگ   دی سربراہی اچ  چین دے اعلیٰ سطح دے  وفد دے  دورہ پاکستان دے موقع تے وزیراعظم ہاؤس اچ ݙوہیں ملکاں وچالمفاہمت دی 6 دستاویزات اتے یادداشتاں تے دستخطاں دی تقریب دے موقع تے خطاب کریندیں ہوئیں وزیراعظم محمدشہبازشریف چینی وفد دا بھرپور خیرمقدم کریندیں ہوئیں آکھیا جو سی پیک دے ݙاہ سال پورے تھیوݨ تے چین دے اعلیٰ سطح دے وفد دے دورہ پاکستان تے او چین دی قیادت دا شکریہ ادا کریندن۔ وزیراعظم آکھیا جو اڄ توں ݙاہ سال پہلے اوں ویلھے دے وزیراعظم محمد نوازشریف اتے چین دے صدر شی جن پنگ سی پیک تے دستخط کیتے ہن تاں معاہدے تے دستخظ دی مَس سکݨ توں پہلے عملدرآمد شروع تھیا۔ وزیراعظم آکھیا جو سی پیک دے تحت پاکستان اچ بجلی، سڑکاں دا ڈھانچہ، پن بجلی اتے پبلک ٹرانسپورٹ سودھے مختلف شعبیاں اچ 25 ارب ڈالر توں ودھ دی سرمایہ کاری تھئی اے۔ اڄ معاہدے اتے ایم او یوز تے دستخطاں دے بعد اساں سی پیک دے ݙوجھے مرحلے اچ ویندے پیوں جئیں نال ݙوہیں ملکاں وچال نویں ماڈل دے تحت اقتصادی تعاون ودھسی۔ وزیراعظم آکھیا جو ݙوجھے مرحلے اچ   بزنس ٹو بزنس حکمت عملی دے تحت زراعت اتے  انفارمیشن  ٹیکنالوجی دے شعبیاں اچ سرمایہ کاری کیتی ویسی۔ پاکستان چین دے تعاون نال چینی معیار دے مطابق برآمدات یقینی ٻݨیسی۔ وزیراعظم آکھیا جو او چین دے صدر شی جن پنگ  دا شکریہ ادا کریندن جو انہاں پاکستان نال عوامی رابطے ودھاوݨ کیتے نائب وزیراعظم کوں خصوصی ایلچی دے طور پاکستان ٻھیجے۔ اساں  بابائے قوم قائد اعظم محمد علی جناح دے وژن دےمطابق ملک اچ ترقی اتے خوشحالی کیتے آپݨی کوشش کریندے رہسوں۔ ایں توں پہلے  وزیراعظم محمد شہبازشریف  اتے چین دے نائب وزیراعظم ہی  لی فینگ پاکستان اتے چین وچال  6 ایم او یوز اتے معاہدیاں تے دستخط دی تقریب ݙٹھئی۔  وفاقی وزیربرائے منصوبہ بندی ،ترقی تے خصوصی اقدامات پروفیسر احسن اقبال اتے چین دے قومی کمیشن برائے اصلاحات تے ترقی دے وائس چیئرمین  سونگ لیان جوائنٹ کوآپریشن کمیٹی آف سی پیک  اتے  سی پیک فریم ورک  اچ سپیشل ایکسچینج آف میکنزم دے معاہدیاں تے دستخط کیتے۔ سیکرٹری وزارت قومی غذائی تحفظ  تے تحقیق   ظفر حسن   اتے پاکستان اچ چین دی ناظم الامور فانگ  چن سوائے    چین کوں ساوی مرچ دی برآمدات بارے دستاویز تے دستخط کیتے۔  این ایچ اے دے ممبر پلاننگ  احسن امین اتے پاکستان اچ چین دی ناظم الامور  فانگ چن سوائے  قراقرم ہائی وے ری الائنمنٹ     فیزٹو دی حتمی فزیبیلٹی  سٹڈی دی یادداشت تے دستخط کیتے۔ ایں توں پہلے ݙوہیں ملکاں   انڈسٹریل ورکر ایکسچینج پروگرام  اتے  ایم ایل ون منصوبے  تے  21 ویں کانفرنس دی تکنیکی کمیٹی دے منٹس تے وی دستخط کیتے۔ ایں موقع تے  وزیرخارجہ بلاول بھٹو زرداری،  وفاقی وزیر اطلاعات تے نشریات مریم اورنگ زیب، وزیر خزانہ سینیٹر اسحاق ڈار، وزیر منصوبہ بندی احسن اقبال ،  وزیر داخلہ رانا ثنا اللہ ، وزیر  تجارت سید نوید قمر،  وفاقی وزیر ریلوے  خواجہ سعد رفیق، وزیرمملکت حنا ربانی کھر، وزیراعظم دے معاون  خصوصی طارق فاطمی  اتے ٻئے اعلیٰ حکام دے علاوہ چینی وفد دے ارکان وی شامل ہن۔