مظفرگڑھ۔ 01 اگست (اے پی پی) کوٹ ادو اتے مظفرگڑھ اچ دریاواں دے ٻیٹ اتے جھکے علاقیاں اچ چھل دے ریلے تباہی مچا ݙتی، ہزاراں ایکڑ تے کھڑی فصل تباہ تھی ڳئی۔ دریائی کٹاؤ پاروں سینکڑاں ایکڑ تے کھڑی فصل چھل دی نذر تھی ڳئی اے اتے درجناں مکان تباہ تھی ڳئن۔کوٹ ادو دے علاقے دائرہ دین پناہ اچ دریائے سندھ تے ہیڈ تونسہ بیراج تے ڈاؤن سٹریم اچ دریائی کٹاؤ تکھا تھیندا پئے۔ پاݨی دے بہاؤ اچ ودھارے اتے سپیڈ پاروں دریائی سپر 30 آر ڈی اچ شگاف پئے ڳئے۔ وہہ ڳئے سٹڈ کوں محکمہ آبپاشی دی ٹیماں مشینری لا تے پتھر سٹݨ دا عمل شروع کر ݙتے۔ مظفرگڑھ دی تحصیل جتوئی دے علاقے لنڈی پتافی اچ وی دریائے سندھ دے کٹاو پاروں سینکڑاں ایکڑ فصل تباہ تھی ڳئی اے۔ دریائے چناب دے سیلابی ریلے مظفرگڑھ دی سب تحصیل رنگپور دے کئی موضعیاں اتے مظفرگڑھ شہر دے موضع سنکی اتے تحصیل علی پور دے علاقہ کندرالہ اچ سینکڑاں ایکڑ کھڑی فصل تباہ کر ݙتی اے۔
