5 فروری ہووے یا 5 اگست اساں بھارت دے غیر قانونی قبضے اچ جموں کشمیر اچ جاری بھارتی ظلم دی داستان دے خلاف کشمیریاں نال یکجہتی کریندے رہسوں، قمر زمان کائرہ

اسلام آباد۔5اگست  (اے پی پی) وزیراعظم دے مشیر برائے امور کشمیر  تے گلگت بلتستان قمر زمان کائرہ آکھیا جو 5   فروری  ہووے یا 5 اگست اساں بھارت دے غیر قانونی قبضے اچ  جموں کشمیر اچ جاری بھارتی ظلم دی داستان دے خلاف کشمیریاں نال یکجہتی کریندے رہسوں۔   بھارت دے   5 اگست2019  دے  کشمیر دی متنازعہ حیثیت کوں بدلݨ دے بھارتی غیر قانونی اقدامات دے خلاف پاکستانی اتے کشمیری عوام ایں ݙینھ کوں یوم استحصال دے طور منیندی پئی اے۔ بھارت کشمیر دی متنازعہ حیثیت کوں بدلݨ کیتے مسلم اکثریتی آبادی دے تناسب کوں بدلݨ دی سازش کریندا پئے۔ پہلے وی بھارتی سازشاں ناکام تھئین اتے ہݨ وی کشمیری آپݨی جدوجہد نال ایں سازش کوں ناکام ٻݨیسی۔ اے ڳالھیں انہاں چھݨ چھݨ کوں یوم استحصال دے موقع تے شاہراہ دستور ڈی چوک تے تھیوݨ آلی ریلی اتے تقریب توں خطاب کریندیں ہوئیں آکھی۔ یوم استحصال کشمیر بارے شاہراہِ دستور اسلام آباد تے ریڈیو پاکستان چوک توں ڈی چوک تئیں ریلی کݙھی ڳئی۔ ریلی اچ پاکستان اتے کشمیری عوام دے علاوہ  سول سوسائٹی دے نمائندے ، کشمیری حریت قیادت  اتے پاکستان سویٹ ہومز دے ٻال شریک تھیے۔ ایں موقع تے عوام بھارت دے پنج اگست 2019 دے اقدامات دے خلاف احتجاج کیتا اتے مقبوضہ کشمیر دی عوام نال یکجہتی اتے شہدائے کشمیر کوں خراج عقیدت پیش کرݨ کیتے ہک منٹ چپ رہیے۔  ریلی دی قیادت وزیر اعظم دے مشیر برائے امور کشمیر تے گلگت بلتستان قمر زمان کائرہ کریندے پئے ہن۔