سپیشل انویسٹمنٹ فیسلی ٹیشن کونسل تے سی پیک منصوبے رل تے ملک کوں معاشی ترقی دے رستے تے ٹریسن ،وزیراعظم شہبازشریف

اسلام آباد۔7اگست (اے پی پی) وزیراعظم  محمد شہبازشریف آکھیے سپیشل انویسٹمنٹ فیسلی ٹیشن کونسل تے سی پیک منصوبے رل تے ملک کوں معاشی ترقی دے رستے تے ٹوریسن ، چینی کمپنیاں دے پاکستان اچ کم کرݨ نال روزگار دے نویں موقع بݨسن ،چینی کمپنیاں سی پیک اچ 30 ارب ڈالر توں ودھ سرمایہ کاری کیتی اے ۔اے ڳالھ انہاں سی پیک اتے ترقیاتی کماں اچ خدمات انجام ݙیوݨ آلیاں چینی کمپنیاں تے بینکاں کوں ایوارڈ ݙیوݨ دی تقریب توں خطاب کریندے ہوئیں آکھی اے ۔ وزیراعظم آکھیے سی پیک منصوبیں پاکستان دی صنعتی ترقی اچ اہم کردار ادا کیتے جیں توں نہ صرف ملازمتاں دے موقع بݨیے بلکہ ݙوہیں ملکاں وچال برادرانہ اتے معاشی تعلقات تکڑے تھئن ، اساں بیلٹ اینڈ روڈ انیشی ایٹو دےتحت سی پیک منصوبیں دے 10 سال مکمل تھیوݨ تے تقریبات منائن ۔ اے منصوبہ چینی صدر شی جن پنگ دی ذہانت اتے وژن دا عکاس اے۔ انہاں منصوبیں پاروں چینی کمپنیاں 30 ارب  ڈالر دی سرمایہ  کاری پاکستان وچ کیتی اے ۔ صدر شی جن پنگ دی قیادت اچ چینی حکومت تے کمپنیاں  پاکستان اچ معاشی منظر نامے کوں بدالݨ اچ اہم کردار ادا کریندیاں پئن ، انہاں آکھیے ہݨ سی پیک دا ݙوجھا مرحلہ شروع تھی چکیے جیں اچ گرین کوریڈور، انوویشن ، آئی ٹی کوریڈور ، خصوصی اقتصادی زونز جیہے وݙے منصوبے شامل ہن ۔ اے سی پیک دے تحت چینی اتے پاکستانی حکومت  دے کاروباری منصوبے ہن۔سپیشل انویسٹمنٹ فیسلی ٹیشن کونسل   (ایس آئی ایف سی)  حکومت دا اہم اقدام اے۔ اے کثیر الجہتی فورم اے جیں اچ وفاق ،  صوبائی اکائیاں تے پاک فوج دی نمائندگی شامل اے۔ آرمی چیف جنرل عاصم منیر ایں معاملے اچ سرگرمی توں حصہ گھندے پئن ۔او پاکستان دے کاز کوں ودھارا ݙیوݨ چاہندن ، ایجھے نینگر جنہاں کنے تعلیم تے ٹیلنٹ تاں اے مگر انہاں کنے ملازمتاں کائنی انہاں کوں ایندے نال روزگار دے موقع ملسن تے او قومی ترقی اچ اہم کردار ادا کرسڳسن ۔ ایں توں ملک دیاں صنعتاں تے زراعت کوں ودھارا ݙیوݨ اچ مدد ملسی ۔ چینی ناظم الامور نہ صرف  سی پیک منصوبیں بلکہ ݙوہیں ملکاں وچال دوستانہ تعلقات ودھاوݨ اچ اہم کردار ادا کیتے ۔ ایں موقع تے وزیراعظم محمد شہباز شریف سی پیک اتے ترقیاتی کماں اچ خدمات ݙیوݨ آلیاں چینی کمپنیاں تے بینکاں دے نمائندگان اچ ایوارڈز ݙتے ۔ ایں موقع تے وفاقی وزیر توانائی انجینئر خرم دستگیر، وفاقی وزیر سرمایہ کاری چوہدری سالک حسین ، چینی ناظم الامور دے علاوہ  اعلیٰ حکام وی موجود ہن ۔