ریاض۔11اگست(اے پی پی) سعودی عرب دے مفتی اعظم، سینئر علما کونسل دے چیئرمین اتے قائمہ کمیٹی سائنسی تحقیق دے چیئرمین شیخ عبدالعزیز بن عبداللہ آل الشیخ خادم حرمین شریفین شاہ سلمان دی طرفوں عالمی اسلامی کانفرنس (رابطہ و ہم آہنگی)کراوݨ دی منظوری کوں تعریف دے قابل قرار ݙے ݙتا۔ سعودی ذرائع ابلاغ موجب ایں کانفرنس دا انعقاد اسلامی امور، دعوت تے رہنمائی دی وزارت کریندی پئی اے ۔ جیں اچ پوری دنیا توں مختلف شعبیں دے 150 علمائے کرام، مفتیان عظام اتے شیخ شرکت کریندے پئن ۔ 2 ݙینھ دی کانفرنس 26 تے 27 اگست کوں تھیسی ۔سعودی عرب دے مفتی اعظم ایں ڳالھ دی تصدیق کیتی اے جو خادم حرمین شریفین دی منظوری نال ایں کانفرنس نال پوری دنیا دے مسلماناں اچ سعودی عرب دی دلچسپی تے ایندی اسلامی تعلیمات کوں کھنڈاوݨ دی خواہش دا اظہار تھیندے ۔ کتاب و سنت موجب دین تے دنیا اچ امن تے محبت کھنڈاوݨ دے سعودی عرب دے جذبہ دا وی اظہار تھیندے۔انہاں آکھیے مکہ مکرمہ اچ اے کانفرنس ایجھے ویلھے تھیندی پئی اے جݙاں کجھ جھیڑے تے نفرتاں تھیندیاں پئن، کانفرنس ایں سنھیے دا ثبوت اے جو مملکت اسلام دی رواداری ، اعتدال پسندی اتے بقائے باہمی دی دعوت دنیا دے سامݨے پیش کریندی اے ۔
