بیو روکریسی کوں اسلام دے بنیادی اصولاں تےعمل کریندے ہوئیں ملک تے قوم دی خدمت کرݨی ہوسی ،صدر مملکت دا افسراں دی گریجوایشن تقریب توں خطاب

لاہور۔11اگست(اے پی پی) صدر مملکت ڈاکٹر عارف علوی آکھیے ہر بندے کوں ملکی ترقی کیتے آپݨے آپݨے حصے دا کردار نبھاوݨا ہوسی ،بیو روکریسی کوں اسلام دے بنیادی اصولاں تے عمل کریندے ہوئیں ملک تے قوم دی خدمت کرݨی ہوسی ۔ ݙوجھے ملکاں تے انحصار دی بجائے خود کفالت کیتے جدو جہد کرݨی ہوسی ۔ اے ڳالھ انہاں نیشنل سکول آف پبلک پالیسی اچ 118 ویں نیشنل مینجمنٹ کورس و سینئر سرکاری افسراں دی گریجوایشن تقریب توں خطاب کریندے ہوئیں آکھی اے ۔صدر مملکت آکھیے ملکی ترقی اچ سرکاری افسراں تے اہلکاراں دا کردار مثالی ہووݨا چاہیدے ،بہتر نظم و نسق اتے بد عنوانی مکاوݨ نال ہی معاشرے ترقی کریندن ۔انہاں آکھیے علم دے نال نال جذبات دی تربیت وی ضروری اے۔افسراں نال الویندے ہوئیں انہاں آکھیے انسانی زندگی دے اندر کجھ فارمیٹو سال ہوندن جنہاں توں تساں گزر چکیے وے جݙاں تساڈی تربیت کیتی ویندی تاں ایندے اچ مینجمنٹ دی ٹیکنالوجی دے حوالے نال تساکوں ݙسایا ویندے جو لوکاں کوں گھن تے ٹرݨ دی نویں مینجمنٹ  ٹیکنیکس  دا ݙسایا ویندے ۔ ہر آوݨ آلی حکومت دا انحصار سینئر سرکاری افسراں تے ہوندے ،ملکی نظم و نسق کوں چلاوݨ کیتے تساݙا کردار لازمی اے ،پاکستان اچ چنڳے مندے ݙوہیں قسم دے لوکاں دا انحصار وی تساں تے ہے۔ انہاں آکھیے تساکوں حکومت کوں صحیح رستے تے چلاوݨ تے ملک توں کرپشن مکاوݨ کیتے اپݨی صلاحیتاں کوں منواوݨا چاہیدے ،علم دے معاملے اچ تساں اچ انکساری ہووݨی چاہیدی اے ۔ تقریب دے چھیکڑ اچ صدر ممکت 33ویں سینئر مینجمنٹ کورس اتے 118 ویں نیشنل مینجمنٹ کورس  دے شرکا اچ سنداں ونڈیاں ۔ ایندے توں پہلے ڈائریکٹر نیشنل سکول آف پبلک پالیسی ڈاکٹر اعجاز منیر کورس دے اغراض و مقاصد تے روشنی پاتی ۔