ڈیرہ غازی خان۔ 12 اگست (اے پی پی) ڈیرہ غازی خان اچ طالبہ نال زیادتی دے مبینہ ملزمان کوں پولیس گرفتار کرڳھدے ۔ پولیس ترجمان موجب غازی یونیورسٹی دے شعبہ فزکس دی طالبہ ثناء ارشاد گزریل ݙینھاں ویڈیو بیان جاری کریندے ہوئیں موقف اختیار کیتا ہئی جو ایندے نال مبینہ طور ھک پروفیسر جنسی زیادتی کیتی اے تے ݙوجھا پروفیسر بلیک میل کریندا پئے۔جیں دا آئی جی پنجاب نوٹس گھندے ہوئیں ڈی پی او ڈیرہ غازی خان کوں ملزمان دی وختی گرفتاری اتے مقدمہ درج کرݨ دی ہدایت کیتی ہئی ۔ جیں تے طالبہ ثناء ارشاد دی مدعیت اچ تھاݨہ گدائی اچ مقدمہ درج کیتا ڳیا ۔ جیں اچ مدعیہ موقف اختیار کیتا میݙی کلاس فیلو طاہرہ لال میکوں اضافی نمبرݙیواوݨ دے بہانے اڄوکے سال مئی دے مہینے اچ شعبہ فزکس دے ہیڈ آف ڈیپارٹمنٹ ڈاکٹر ظفر وزیر اتے ڈاکٹر خالد خٹک کنے گھن ڳئی تے ڈاکٹر ظفر وزیر میکوں نشہ آور مشروب پلا تے میں نال جنسی زیادتی کیتی تے ڈاکٹر خالد خٹک میکوں تے چھوٹی بھیݨ جیڑھی جو یونیورسٹی دی طالبہ اے، حالی تئیں بلیک میل کریندا پئے ۔ ایں تے ڈی پی او ڈیرہ غازی خان ملزمان دی گرفتاری کیتے ٹیم بݨائی تے پولیس ملزمان کوں گرفتار کرڳھدے ۔انہاں مزید ݙسائے جو پولیس مقدمے دے سار ےپہلواں کوں سامݨے رکھیندے ہوئیں تفتیش کریندی پئی اے ۔
