اسلام آباد۔17اگست (اے پی پی سرائیکی سروس) لاہور ہائی کورٹ بار ایسوسی ایشن بہاول پور تے سول سوسائٹی آف بہاولپور ولوں وسیب دے نامور اگواݨاں ،ادیبا ں،شاعراں دے اعزاز اچ ہک تقریب ہائی کورٹ بار روم اچ وسیبی کٹھ رکھی گئی ۔تقریب اچ سیاسی سماجی،ادبی شخصیات شرکت کیتی ۔تقریب دی صدارت جنرل سیکرٹری ہائی کورٹ بار ایسوسی ایشن بہاول پور طاہر محمود جتوئی کیتی ، ایں موقع تے متفقہ طور تے سرائیکی صوبہ دے حق اچ قرارداد وی منظور کیتی گئی۔ وسیبی کٹھ توں مرکزی صدر سرائیکی لوک سانجھ پروفیسر اکرم میرانی،سابق جج میاں فیض الحسن،فاروق رند ایڈوکیٹ،مرکزی جنرل سیکرٹری سرائیکی لوک صدر چولستان بچاؤ کمیٹی راشد عزیز بھٹہ،کنوینئر سول سوسائٹی آف بہاول پور ملک امتیاز چنڑ،پروفیسر میاں مشتاق،مرکزی نائب صدر پاکستان سرائیکی پارٹی علامہ اقبال وسیم،سردار منظور خان دریشک،صدر بہاول پور سرائیکی لوک سانجھ ملک رفیق قمر ایڈوکیٹ،جنرل سیکرٹری اکرم ناصر،سردار عاشق خان بلوچ ایڈوکیٹ،میاں عبدالرشید راشد ایڈووکیٹ ،خادم حسین مخفی تے ڈوجھیاں خطاب کریندے ہوئےآکھیا جو پاکستان دے متوازن وفاق اتے استحکام پاکستان کیتے سرائیکی صوبہ ہنگامی بنیاداں تے ٻݨایا ونجے ، سرائیکی وسیب دے لوک خیرات نی آپدا حق مگدن جو انھاں دا آپدا خطہ تے آپدی تہذیب تے ثقافت موجود اے۔مقررین آکھےجو چولستان دے لوکیں دے بہوں مسائل ان او حل کیتے ونجن تے چولستان اچ لکھاں دی تعداد اچ لائیوسٹاک اے حکومت کوں چاہیدے انھاں دی بہتری سانگے اقدامات کرے۔تقریب اچ وکیلاں کمیونٹی تے بہاول پور دی معروف سیاسی تے سماجی شخصیات وڈی تعداد اچ شریک تھئی۔
