لاہور۔18اگست (اے پی پی) ترجمان پراونشل ڈیزاسٹر مینجمنٹ اتھارٹی پنجاب جمعے کوں جاری بیان اچ ݙسیا جو دریائے ستلج اچ گنڈا سنگھ والا دی ڄاہ تے وچلے درجے دا چھل اے جتھ پاݨی دا ٻہاؤ ہک لکھ پنڄاہ ہزار کیوسک تئیں پڄ ڳئے۔ دریا اچ پاݨی دی سطح اُچھی تھیندی ویندی اے۔ آندے چووی گھنٹیاں اچ گنڈا سنگھ والا دی ڄاہ تے اُچے درجے دا چھل آسڳدے۔ ترجمان آکھیا جو بھارت ولوں ٻیا پاݨی چھوڑݨ دا وی ݙر اے۔ چھل نال دریائے ستلج نال جڑے ضلعیاں دے جھکے علاقے پاݨی تلوں آوݨ دا ݙر اے۔ قصور، اوکاڑہ، پاکپتن، بہاولنگر، وہاڑی، لودھراں، ملتان اتے بہاولپور تے ضلعے دریائے ستلج اچ ہن۔ ڈی جی پی ڈی ایم اے عمران قریشی متعلقہ ضلعیاں دی انتظامیہ کوں سارے انتظامات پورے کرݨ دی ہدایت کیتی اے۔
