اسلام آباد۔25اگست(اے پی پی) پاکستان کرکٹ ٹیم دے مایہ ناز بلے باز اتے کپتان بابر اعظم ون ڈے کرکٹ اچ نواں ریکارڈ بݨاݙتے ۔28 سالہ بابر اعظم تاریخ رقم کریندے ہوئیں خمیس کوں افغانستان دے خلاف ترائے ون ڈے میچاں دی سیریز دے ݙوجھے ھک ݙینھ وار دے میچ اچ بین الاقوامی کرکٹ تے ھک نواں ریکارڈ آپݨے ناں کر ڳھدے ۔افغانستان 22 توں 26 اگست وچال سیریز کیتے سری لنکا اچ پاکستان دی میزبانی کریندا پئے ۔خمیس کوں سری لنکا،ہمبنٹوٹا اچ کھیݙیے ڳئے ترائے میچاں دی سیریز دے ݙوجھے ھک ݙینھ وار رے میچ اچ پاکستان اوکھے مقابلے توں بعد افغان ٹیم کوں ھک وکٹ توں ہرا تے ترائے میچاں دی سیریز اچ 0-2 نال فیصلہ جھُݨ ڳھدے ۔ایں میچ اچ پاکستان ٹیم دے کپتان بابر اعظم ون ڈے انٹرنیشنل کرکٹ دی پہلی 100 اننگز اچوں ساریں توں ودھ رنز بݨاوݨ دا ریکارڈ بݨا ڳھدے ۔ بابر اعظم ون ڈے کیریئر دی پہلی 100 اننگز اچ 58.43 دی اوسط نال 5142 رنز بݨا تے اعزاز آپݨے ناویں کر ڳھدے ۔ اے ھک قابل ذکر کارنامہ اے ایندے توں پہلے جنوبی افریقا دے ہاشم آملہ آپݨی پہلی 100 ون ڈے اننگز اچ 4946 رنز بݨائے ہن ۔بابر اعظم 100 ون ڈے اننگز دے بعد ساریں توں ودھ رنز بݨاوݨ آلے بلے بازاں دی فہرست اچ ٹاپ پوزیشن تے آڳئن ۔
