ڈیرہ غازی خان۔ 25 اگست(اے پی پی) کمشنر ڈیرہ غازی خان ڈاکٹر ناصر محمود بشیر آکھیے ڈویژن اچ 80 توں ودھ مردانہ تے زنانہ سکولاں دی چوݨ کرتے ماڈل سکول دا درجہ ݙتا ویسی جتھاں معیاری تعلیم نال چنڳیاں سہولتاں ملسن ۔ اے ڳالھ انہاں ھک اجلاس دی صدارت کریندے ہوئیں آکھی اے ۔ ڈاکٹر ناصر محمود بشیر آکھیے ہر ضلع اچ گھٹ توں گھٹ 20 مردانہ تے زنانہ سکولاں دی فہرست تیار کرتے انہاں کوں ماڈل سکول دا درجہ ݙتا ونڄے ۔انہاں آکھیے ڈیرہ غازی خان ڈویژن اچ انسداد سموگ مہم دے تحت سلھیں دے سارے بٹھیں زیگ زائیگ ٹیکنالوجی تے منتقل کرائے ونڄن تے پرائس کنٹرول مجسٹریٹس دی کارکردگی دا جائزہ گھندے ہوئیں ڈویژن دی ہر سبزی منڈی اچ پھل تے سبزیاں دی نیلامی مانیٹر کیتی ونڄے ۔ مارکیٹاں اچ کھاوݨ پیوݨ دیاں شنہیں دے سرکاری نرخ نامے سامݨے لاتے ونڄن تے ناجائز منافع خوری تے جرمانے،مقدمیں تے گرفتاریاں عمل اچ گھن آئیاں ونجن ۔انہاں آکھیے پنجاب حکومت دے پروگرام “اب گاؤں چمکیں گے”دے تحت یونین کونسل سطح تے ٹیماں بݨائیاں ونڄن تے ہر وستی دیاں ڳلیاں دے نمبر دے بوڑڈ لاوݨ دے نال صفائی کیتے افرادی قوت تے مشینری مختص کیتی ونڄے ۔
